यंदाच्या दीपोत्सवात सातचा महिमा

दरवर्षीची दिवाळी काही ना काही वैशिष्ट्य घेऊन समोर येते. आनंद वाढवते. जीवनात प्रकाश आणते. नैराश्याची काजळी दूर करून वृत्ती उजळवून टाकते.

रोषणाईचा उत्सव म्हणून साजरी होणारी दिवाळी आनंदाचे अनेक क्षण कुटुंबात आणते. यंदा ७ नोव्हेंबरला कार्तिक कृष्ण अमावस्येला दीपोत्सव साजरा केला जाणार आहे. तज्ज्ञांच्या म्हणण्यानुसार या वेळी दिवाळीवर ग्रहांच्या विशेष स्थितीमुळे ७ वर्षांनंतर एक खास योग जुळून आला आहे. असे मानले जाते, की हा योग सर्वांसाठी सुख-समृद्धी घेऊन येणारा ठरणार आहे. या वेळी सातवी राशी तूळ सात वर्षांनी सूर्य, शुक्र आणि चंद्र या तीन ग्रहांसोबत एकत्र येणार आहे. योगायोगाची बाब म्हणजे दिवाळीचा मुख्य दिवसही ७ तारखेला आला आहे. त्यामुळे हे दिवस ७ तारखेला जन्मलेल्या लोकांसाठी फार शुभ मानले जात आहेत.

धनत्रयोदशीचे शुभ मुहूर्त
५ नोव्हेंबरला धनत्रयोदशी साजरी केली जाणार. या दिवशी पूजेसाठी सायंकाळी ६.०५ वाजेपासून ते ८.०१ वाजेपर्यंत शुभ मुहूर्त असेल. शुभ मुहूर्ताचा कालावधी १ तास ५५ मिनिटांचा असेल. तर या दिवशी खरेदी करण्याचा मुहूर्त सकाळी ७ वाजेपासून ते ९ वाजून १५ मिनिटांपर्यंत, दुपारी १ वाजेपासून ते २ वाजून ३० मिनिटांपर्यंत तर सायंकाळी ५ वाजून ३५ मिनिटांपासून ते ७ वाजून ३० मिनिटांपर्यंत असेल.

दिवाळीचे शुभ मुहूर्त
७ तारखेला लक्ष्मीपूजनाचा शुभ मुहूर्त सायंकाळी ५ वाजून २० मिनिटांपासून ते ७ वाजून २० मिनिटांपर्यंत असणार आहे. तर व्यापाऱ्यांसाठी पूजेचा मुहूर्त सायंकाळी ५ वाजून ५० मिनिटांपासून ते ७ वाजून ५० मिनिटांपर्यंत असणार आहे.