शिंदे-फडणवीस सरकारचे मंत्री मंगलप्रभात लोढा यांनी मनसे प्रमुख राज ठाकरेंची घेतली भेट

काही दिवसांपूर्वीचे राज्याचे उपमुख्यमंत्री देवेंद्र फडणवीस यांनी शिवतीर्थ निवासस्थानी जात राज ठाकरेंची भेट घेतली होती.

मुंबई - राज्यातील सत्तानाट्यात एकनाथ शिंदे यांनी बंड पुकारल्यानंतर त्यांच्या सोबतीला शिवसेनेचे ४० आमदार आणि १२ खासदारांनी पाठिंबा दिला. त्यामुळे उद्धव ठाकरे यांचे महाविकास आघाडी सरकार अल्पमतात आले. विधानसभेत बहुमत चाचणी होण्यापूर्वीच उद्धव यांनी मुख्यमंत्रिपदाचा राजीनामा दिला. त्यानंतर मुख्यमंत्री एकनाथ शिंदे आणि उपमुख्यमंत्री म्हणून देवेंद्र फडणवीस यांनी शपथ घेतली. 

राज्यातल्या मंत्रिमंडळ विस्तार कधी होणार असा प्रश्न सगळ्यांना पडला होता. त्यात मंगळवारी ९ ऑगस्टला महिनाभरापासून रखडलेला मंत्रिमंडळ विस्तार पार पडला. शिंदे-फडणवीस सरकारच्या पहिल्या मंत्रिमंडळ विस्तारात १८ जणांना संधी देण्यात आली. त्यात भाजपाकडून ९ आणि शिंदे गटाकडून ९ जणांनी मंत्रिपदाची शपथ घेतली. या मंत्रिमंडळ विस्तारात पहिल्यांदाच मंत्रिपदाची शपथ घेणाऱ्यांमध्ये मंगलप्रभात लोढा यांचं नाव पुढे येते. 

आगामी महापालिका निवडणुकीच्या दृष्टीने मुंबई भाजपा अध्यक्षपदाची जबाबदारी असणारे मंगलप्रभात लोढा यांना कॅबिनेट मंत्रिपद देण्यात आले आहे. मंत्रिपदाच्या शपथविधीला २४ तास उलटत नाहीत तोवर मंगलप्रभात लोढा यांनी मनसे प्रमुख राज ठाकरे यांची त्यांच्या शिवतीर्थ निवासस्थानी जात भेट घेतली. या भेटीनंतर राजकीय वर्तुळात चर्चांना उधाण आले आहे. अलीकडच्या काळात राज ठाकरेंची भाजपा नेत्यांसोबत जवळीक वाढली असून मनसे-भाजपा एकत्र येण्याच्याही चर्चा आहेत. 

राज्याचे नवनियुक्त कॅबिनेट मंत्री श्री. मंगलप्रभात लोढा यांनी आज महाराष्ट्र नवनिर्माण सेनेचे अध्यक्ष मा. श्री. राजसाहेब ठाकरे यांची 'शिवतीर्थ ' निवासस्थानी सदिच्छा भेट घेतली. #MNSAdhikrutpic.twitter.com/PPqcBvrJE9

— MNS Adhikrut - मनसे अधिकृत (@mnsadhikrut) August 10, 2022

काही दिवसांपूर्वीचे राज्याचे उपमुख्यमंत्री देवेंद्र फडणवीस यांनी शिवतीर्थ निवासस्थानी जात राज ठाकरेंची भेट घेतली होती. या भेटीत दोन्ही नेत्यांमध्ये २ तास चर्चा झाली होती. राज्यात शिंदे गट शिवसेनेतून फुटून वेगळं अस्तित्व निर्माण करण्याचा प्रयत्न करतोय. खरी शिवसेना आमचीच आहे असा दावा शिंदे गटाकडून केला जात आहे. विधानसभेत दोन तृतीयांश बहुमत आमच्याकडे आहे. आम्ही पक्षातून बाहेर पडलो नाही तर शिवसेना आमचीच आहे आम्ही फक्त नेता बदलला आहे असं शिंदे गटातील आमदार सांगत आहे. शिंदे गटाच्या या दाव्याबाबत अद्याप कायदेशीर लढाई कोर्टात सुरू आहे. शिंदे गटाला इतर पक्षात विलीन व्हावेच लागेल असं सांगण्यात येते. त्यात पर्यायाने मनसेचं नाव पुढे येते. त्यात शिंदे-फडणवीस सरकारला मनसेनं सभागृहात मतदान केले आहे. त्यात देवेंद्र फडणवीस यांच्यानंतर आता मंगलप्रभात लोढा यांच्या राज भेटीनं अनेकांच्या भूवया उंचावल्या आहेत.