विचित्र अपघातात सिन्नरचे 3 ठार

मुंबई-नाशिक महामार्गावरील कसारा बायपास येथे झायलो गाडीला झालेल्या अपघातात 3 ठार तर 1 जखमी झाला.

कसारा : मुंबई-नाशिक महामार्गावरील कसारा बायपास येथे झायलो गाडीला झालेल्या अपघातात 3 ठार तर 1 जखमी झाला. मुंबईहून नाशिकच्या दिशेने ही गाडी कसारा बायपासजवळील अमन हॉटेलनजीक चालकाचा गाडीवरील ताबा सुटल्याने डिव्हायडरला धडकून मुंबईकडे जाणा:या कंटेनरला धडकून पुन्हा डिव्हायडरवर पलटी झाली. यात गाडीतील विवेक तानाजी घुगे (25), अभिषेक केंद्रेकर (24) व वैभव विनोद विनरकर हे तीन तरुण जागेवरच मृत्युमुखी पडले, तर समीर सानप (25) सर्व रा. दोडी (सिन्नर) हा गंभीर जखमी झाला.

अपघात इतका भयानक होता की, तीन तरुण गाडीच्या बम्परमध्ये अडकून पडले होते. अपघातस्थळी महामार्ग पेट्रोलिंग करणा:या गॅमन इंडिया पथकाने व कसारा पोलिसांनी त्वरित धाव घेऊन अडकून पडलेल्या मृतदेहांना क्रेनच्या साहाय्याने बाहेर काढले. गंभीर जखमी असलेल्या समीर सानप यास नाशिक येथील रुग्णालयात दाखल केले असून रात्री 9 च्या सुमारास अपघात झाल्याने मदतकार्यात अडथळे येत होते. दरम्यान, या प्रकरणी पोलीस ठाण्यात गुन्हा दाखल करण्यात आला असून वळणदार रस्ता व समोरून येणा:या गाडय़ांच्या लाइटमुळे चालकाचा ताबा सुटल्याने या निष्पाप तरुणांचा बळी गेल्याचे बोलले जात आह़े 

या प्रकरणी पुढील तपास उपविभागीय अधिकारी प्रशांत वाघुडे यांच्या मार्गदर्शनाखाली कसारा पोलीस ठाण्याचे प्रभारी अधिकारी अजय वसावे करीत आहेत.  

(वार्ताहर)