अ.भा.म.सा.महामंडळाच्या निधी संकलनाचा श्रीगणेशा

अखिल भारतीय मराठी साहित्य महामंडळाने निधी मोहिमेची संकल्पना राबविण्यास सुरुवात केली आहे. या निधी संकलन मोहिमेचा श्रीगणेशा नुकताच कराड येथील शिवाजी शिक्षण संस्थेच्या यशवंतराव चव्हाण

मुंबई : अखिल भारतीय मराठी साहित्य महामंडळाने निधी मोहिमेची संकल्पना राबविण्यास सुरुवात केली आहे. या निधी संकलन मोहिमेचा श्रीगणेशा नुकताच कराड येथील शिवाजी शिक्षण संस्थेच्या यशवंतराव चव्हाण विज्ञान महाविद्यालय व वेणूताई चव्हाण महाविद्यालयातील प्राध्यापक आणि विद्यार्थी यांच्या वतीने १० हजार रुपयांच्या मदतीने करण्यात आला.लोकसहभागातून निधी उभारण्याकरिता महामंडळाचे सदस्य रवींद्र बेडकिहाळ यांची एक सदस्यीय निधी संकलन समितीही स्थापन करण्यात आली. महामंडळाच्या वतीने विद्यार्थ्यांनी प्रत्येकी एक रुपया व प्राध्यापक, शिक्षक, कर्मचारी यांनी प्रत्येकी १० रुपये द्यावेत, तसेच महामंडळाच्या कार्यात आपला सहभाग नोंदवावा, असे आवाहन करण्यात आले होते. हा निधी शिवाजी शिक्षण संस्थेचे सहकार्यवाह प्रकाशबापू पाटील यांनी सुपुर्द केला. महामंडळाचे अध्यक्ष डॉ. श्रीपाद भालचंद्र जोशी यांनी राज्यातील सर्वच विभागांतील शिक्षण संस्थांनी आणि महाविद्यालयाने या मोहिमेत सहभाग घ्यावा, असे आवाहन केले आहे. (प्रतिनिधी)