ट्रेलर ट्रक ब्रीजवरून कोसळला

- कोणतीही जीवितहानी नाही

लोकमत न्यूज नेटवर्क

मुंबई : जोगेश्वरीच्या पश्चिम दृतगती महामार्गावर रविवारी पहाटे एक ट्रेलर ट्रक ब्रीजवरून खाली कोसळला. यात कोणत्याही प्रकारची जीवितहानी झालेली नाही. अग्निशमन दलाच्या जवानांनी घटनास्थळी धाव घेत वाहन बाहेर काढले.

स्थानिकांनी दिलेल्या माहितीनुसार, पहाटे मोठा आवाज आल्याने ते घटनास्थळी धावले. तेव्हा ब्रिजवरून त्यांच्या घरासमोर असलेला ट्रेलर ट्रक त्यांना दिसला. याबाबत तातडीने त्यांनी पोलीस नियंत्रण कक्षाला कळविले.

मरोळ अग्निशमन दलाच्या जवानांनी घटनास्थळी धाव घेत तो ट्रक टोइंगने तिथून हटविला. सदर ट्रक या परिसरात असलेल्या चाळींच्या दिशेने पडला होता. मात्र त्यात कोणतीही जीवितहानी झाली नसल्याचे अग्निशमन दलाकडून सांगण्यात आले. याप्रकरणी जोगेश्वरी पोलीस तपास करत असून, ट्रकचालक हा अपघातानंतर पसार झाल्याचे त्यांच्याकडून सांगण्यात आले. पोलीस याप्रकरणी त्याचा शोध घेत आहेत.