शिरवली अपघातात दोन ठार, पाच गंभीर

शिरसाड अंबाडी मार्गावरील शिरवली येथे वॅगन आरने दुचाकीला समोरून जोरदार धडक देऊन कारने दोन तीन कोलांट्या खाल्याने भीषण अपघात घडला

शिरसाड : शिरसाड अंबाडी मार्गावरील शिरवली येथे वॅगन आरने दुचाकीला समोरून जोरदार धडक देऊन कारने दोन तीन कोलांट्या खाल्याने भीषण अपघात घडला. यात दुचाकी चालक राहुल गरेल (२०) रा. माजिवली, वसई व वॅगन आरचा चालक अरविंद डोग्रा (४१) यांचा मृत्यू झाला तर अमित ऐडगा (२०) रा. शिरवली यांच्यासह चारजण गंभीर जखमी झाले.
हा अपघात वॅगन आरच्या चालकाच्या चुकीमुळे घडल्याचे प्रत्यक्ष दर्शनी सांगितले. शिरवली येथे या चालकाला वळण घेता न आल्यामुळे त्यांनी समोरून येणााऱ्या दुचाकीला जोरदार धडक देऊन दोन तीन कोलांट्या मारल्या. हा अपघात इतका भीषण होता की दोन्ही गाड्या चक्काचूर होवून राहुल व अरविंद यांचा जागीच मृत्यू झाला. तर दुचाकीवरील पाठीमागे बसलेला अमीत फेकला गेल्यामुळे बचावला. तर कारमधील जखमींना टप तोडून बाहेर काढून उपचारासाठी पाठविले. या गाडीमध्ये दारूच्या बाटल्या सापडल्याने चालकही गाडी सुसाट चालवत असावा असे सुत्राकडून समजले ते मौजमजा करून वजे्रश्वरीहून येत असताना व राहुल व अमीत सायवस येथे यात्रेसाठी जात असताना शिरवली पूर्णाकपाडा येथे काळाने त्यांच्यावर घाव घातला. कारण राहुल यांची काही चुकी नसताना त्याला आपला जीव गमवावा लागला. या मार्गावर दारू पिऊन वाहन चालवण्याचे प्रमाण वाढले असून त्यात निरपराध नागरिकांचे बळी जात आहेत.