उल्हासनगरात दोन मित्रांनी केला मित्राची हत्या

लोकमत न्यूज नेटवर्क

उल्हासनगर : पैशाच्या क्षुल्लक वादातून मित्राची हत्या करणाऱ्या दोन मित्रांना हिललाइन पोलिसांनी अटक केली. सोमवारी रात्री साडेअकरा वाजता लाललोई गार्डनजवळ ही घटना घडली होती.

उल्हासनगर कॅम्प नं. ५, कुर्ला कॅम्प परिसरातील लाललोई गार्डन येथे सोमवारी रात्री साडेअकरा वाजता राहुल घाडगे, बंटी साबळे व मनोज हटकर एकत्र आले होते. राहुल व बंटी साबळे यांच्याकडे पेंटरचे काम करणारा मित्र मनोज हटकर याच्यासोबत पैशाच्या क्षुल्लक कारणावरून वाद होऊन प्रकरण हाणामारीवर गेले. मनोज हटकर याला मारहाण करीत असताना शेजारील सागर कांबळे यांनी मध्यस्थी करण्याचा प्रयत्न केला. मात्र आमचे मित्रांचे भांडण असल्याचे सांगून मध्ये पडू नको, असे त्याला बजावले. मारहाणीत मनोज हटकर याचा जागीच मृत्यू झाला. या प्रकरणी हिललाइन पोलीस ठाण्यात हत्येचा गुन्हा दाखल करून आरोपी राहुल घाडगे व बंटी साबळे यांना पोलिसांनी अटक केली. अधिक तपास पोलीस करीत असल्याची माहिती वरिष्ठ पोलीस निरीक्षक संजय सावंत यांनी दिली.

कुर्ला कॅम्प परिसरातील लाललोई गार्डन गुन्हेगारांचा अड्डा झाला असून गार्डनच्या पडीक दुसऱ्या भागात नशेखोर, भुरटे चोर वावरताना दिसतात. पोलिसांनी गार्डन परिसरात गस्त वाढविण्याची मागणी होत आहे.