लोकमत न्यूज नेटवर्क
मुंबई - दिंडोशीत आयोजित करण्यात आलेल्या क्रिकेट स्पर्धेत अभिनेत्री ऊर्मिला मातोंडकर हिने आमदार सुनील प्रभूंच्या गोलंदाजीवर फटकेबाजी करीत उपस्थित खेळाडूंचा उत्साह वाढवला. यावेळी आपल्या अभिनयाच्या शैलीत भाषण करीत त्यांनी उपस्थितांची मने जिंकली.
दिंडोशी विधानसभा क्षेत्रात शिवसेनाप्रमुख बाळासाहेब ठाकरे यांच्या जयंतीनिमित्त अंडरआर्म सर्कल क्रिकेट स्पर्धा ‘आमदार चषक २०२१’चे आयोजन करण्यात आले. दिंडोशीच्या स्वातंत्र्यवीर सावरकर मैदानात झालेल्या या कार्यक्रमाला ऊर्मिला मातोंडकर प्रमुख अतिथी म्हणून उपस्थित होती. तिचा हा दिंडोशीतील पहिलाच सार्वजनिक कार्यक्रम होता. ऊर्मिला मातोंडकर म्हणाली, ‘या ठिकाणी क्रिकेट खेळताना आणि पाहताना आयपीएल आणि सर्व एकत्र झाल्यासारखे वाटले. एवढ्या कमी ओव्हरमध्ये इतकी मजा येईल, असे मला वाटले नव्हते. आमदार सुनील प्रभू यांनी गोलंदाजी करून मला फलंदाज करून टाकले.’
यावेळी आमदार सुनील प्रभू, उपमहापौर ॲड. सुहास वाडकर, नगरसेविका साधना माने, विनया सावंत, नगरसेवक आत्माराम चाचे, विधानसभा संघटक विष्णू सावंत, प्रशांत कदम, सिनेट सदस्य सुप्रिया कारंडे आणि सर्व शिवसेना पदाधिकारी, कार्यकर्ते आणि क्रीडारसिक मोठ्या संख्येने उपस्थित होते.
‘शेतकरी आंदोलनावर तोडगा निघावा’
ऊर्मिला मातोंडकर हिने यावेळी शेतकरी आंदोलनावरही भाष्य केले. ती म्हणाली, ‘संपूर्ण महाराष्ट्रातून शेतकरी मुंबईत येत आहेत. त्यांचे स्वागत आहे. शेतकऱ्यांच्या या आंदोलनाला माझा पाठिंबा आहे. शेतकऱ्यांच्या प्रश्नांवर तोडगा निघावा आणि त्यांच्या मागण्या लवकरात लवकर पूर्ण होवोत, हेच देवाकडे मागणे आहे.
--------------------------------------