वसईत मंगळसूत्र चोर अटकेत

नालासोपारा शहरामध्ये धूम स्टाईलने येऊन महिलांच्या सोनसाखळ्या पळवून नेण्याच्या घटनांमध्ये चांगलीच वाढ झाली होती

वसई : नालासोपारा शहरामध्ये धूम स्टाईलने येऊन महिलांच्या सोनसाखळ्या पळवून नेण्याच्या घटनांमध्ये चांगलीच वाढ झाली होती. अनेक तक्रारी आल्यानंतर नालासोपारा पोलिसांनी सापळा रचून दोन आरोपींना काल बुधवारी गजाआड केले. या दोघांकडून सुमारे १ लाखाच्या सोनसाखळ्या व मंगळसूत्र जप्त करण्यात आले.मोटरसायकलने मागून येऊन महिलांच्या गळ्यातील मंगळसूत्रे व सोनसाखळ्या पळवणारी एक टोळी नालासोपारा शहरात कार्यरत होती. अनेक महिलांच्या तक्रारी आल्यानंतर नालासोपारा पोलीस ठाण्याच्या वरिष्ठ पोलीस निरीक्षकांनी एक पथक नेमले व या पथकाने समद खान (२७) व फतेह अन्सारी (२३) या दोघांना अटक केली व त्यांच्याकडून १ लाख ११ हजार रुपयांची मंगळसूत्रे व सोनसाखळ्या जप्त केल्या. या टोळीतील एक आरोपी मात्र पळून जाण्यात यशस्वी ठरला. या टोळीने मुंबईतही अनेक गुन्हे केल्याचे उघडकीस आले आहे. (वार्ताहर)