जलसाठा ४० टक्क्यांवर; पाच महिने ‘नो टेन्शन’, मुंबईसह आसपासच्या परिसराला दिलासा

मुंबई महापालिकेच्या वतीने ठाणे, भिवंडी महानगरपालिका व इतर गावांना पाणीपुरवठा केला जातो. 

मुंबई : मुंबईसह आसपासच्या परिसराला पाणीपुरवठा करणाऱ्या मुंबई महापालिकेच्या सात तलाव क्षेत्रात पावसाने दमदार हजेरी लावल्याने मुंबई महापालिकेच्या सातही तलावांत ४०.३२ टक्के एवढा जलसाठा निर्माण झाला आहे. सातही तलाव ४० टक्के भरल्याने पुढील पाच महिने काळजी नाही. 

मुंबई महापालिकेच्या वतीने ठाणे, भिवंडी महानगरपालिका व इतर गावांना पाणीपुरवठा केला जातो. पावसाळ्यामध्ये जून महिन्यात मुंबईस पाणीपुरवठा करणाऱ्या तलाव क्षेत्रात अपुऱ्या पर्जन्यवृष्टीमुळे उपलब्ध जलसाठा लक्षात घेऊन पर्जन्यवृष्टीत सुधारणा होईपर्यंत प्रशासनातर्फे मुंबईच्या पाणीपुरवठ्यात २७ जूनपासून १० टक्के पाणी कपात करण्याचा निर्णय घेण्यात आला होता. जुलैच्या पहिल्या आठवड्यापासून तलाव क्षेत्रात समाधानकारक पाऊस झाल्यामुळे आणि जलसाठा झाल्याने १० टक्के पाणी कपातीचा निर्णय रद्द केला. 

मुंबई महानगराला पाणीपुरवठा करणाऱ्या अप्पर वैतरणा, मोडकसागर, तानसा, मध्य वैतरणा जलाशय, भातसा, विहार आणि तुळशी या सात जलाशयांमध्ये मिळून संपूर्ण मुंबई महानगराला पाणीपुरवठा करण्यासाठी एकूण उपयुक्त जलसाठा १४ लाख ४७ हजार ३६३ दशलक्ष लीटर इतका असावा लागतो. आता हा जलसाठा ५ लाख ८३ हजार ६३९ दशलक्ष लीटर एवढा आहे. पुढील काही दिवस संपूर्ण कोकणपट्ट्याला मुसळधार ते अति मुसळधार पावसाचा इशारा देण्यात आल्याने तलावातील जलसाठादेखील वाढणार आहे.

धरण             एकूण साठा     आजचा साठा     पातळी (मी.)     पाऊस (मिमी)  
भातसा               ९४२.१०          ५१०                 १२३.४०                ८९ 
मोडकसागर       १२८.९३         ९३.६५              १५८.७९               ७३  
तानसा                १४५.०८        ६९.०२               १२४.२४               ६८ 
मध्य वैतरणा       १९३.५३         ६५.६३              २५९.६५              ८९  
अप्पर वैतरणा     ३३१.३१         १५६.४५             ५९७.६४             ८८ 
बारवी                 ३३८.८४        १५२.८५              ६४.०८               १४ 
आंध्रा                  ३३९.१४           ८७.१८            ६५५.२६            १०७