पेट्रोल-डिझेलचे दर कधी वाढू शकतात?; सध्या इंधनाचे दर स्थिर कशामुळे, जाणून घ्या!

उत्तर प्रदेशसह पाच राज्यांच्या निवडणुका असल्याने पुढील महिनाभरात इंधनाच्या किमती वाढण्याची शक्यताही नगण्यच आहे.

गेल्या काही दिवसांपासून पेट्रोल-डिझेलच्या किमती कमालीच्या स्थिर आहेत. उत्तर प्रदेशसह पाच राज्यांच्या निवडणुका असल्याने पुढील महिनाभरात इंधनाच्या किमती वाढण्याची शक्यताही नगण्यच आहे.

कच्च्या तेलाच्या दरात चढ-उतार

• गेल्या ७० दिवसांपासून पेट्रोल आणि डिझेलचे दर स्थिर आहेत.
• उल्लेखनीय म्हणजे याच कालावधीत कच्च्या तेलाच्या किमतीत वाढ झाली.
• ४ नोव्हेंबरनंतर देशभरात इंधनाचे दर वाढलेले नाहीत.

कच्च्या तेलाच्या किमती वाढल्यास आयात बिलावर त्याचा परिणाम होतो. कच्च्या तेलाच्या किमती जानेवारी अखेरीस ९० ते १०० डॉलर प्रति बॅरलचा टप्पा ओलांडू शकतात. महागाई व रुपयाच्या किमतीवरही परिणाम संभवतो.  परंतु ५ राज्यांच्या निवडणुकांमुळे केंद्र सरकार किमान दोन महिने तरी पेट्रोल व डिझेलच्या किमती वाढवण्याच्या मानसिकतेत नाही.

वाहतूक  सुरूच; तरीही...

• कोरोनाची तिसरी लाट सुरू असली तरी लॉकडाउन होण्याची चिन्हे नाहीत.
• लसीकरण आणि कोरोनाबाधितांमधील सौम्य लक्षणे यांमुळे संपूर्ण लॉकडाउन होणे शक्य नाही.
• परिणामी देशभरात मालवाहतूक तसेच प्रवासी वाहतूक सुरूच आहे.
• याचाच अर्थ पेट्रोल आणि डिझेलची मागणी कायम आहे.

१० मार्चनंतरच दरवाढ?

• ५ राज्यांचे निवडणूक निकाल १० मार्च रोजी लागणार आहेत.
• या राज्यांच्या निकालानंतरच कदाचित पेट्रोल-डिझेलच्या किमती वाढू शकतात.

सध्या किती दर?

शहर    पेट्रोल    डिझेल 
मुंबई     १०९.९८    ९४.१४
दिल्ली     ९५.४१    ८६.६७
चेन्नई    १०१.४०    ९१.४३
कोलकाता    १०४.६८    ८९.७९