आदेश असतानाही मराठी चित्रपटांना मल्टिप्लेक्स नाकारणा-यांवर कारवाई का नाही ? - नाना पाटेकर

सरकारने मल्टिप्लेक्सना मराठी चित्रपटांच्या स्क्रिनिंगचा आदेश दिला असतानाही थिएटर मालक उल्लंघन का करत आहे ? असा प्रश्न ज्येष्ठ अभिनेते नाना पाटेकर यांनी विचारला आहे

मुंबई - देवा आणि गच्ची या मराठी चित्रपटांनी स्क्रीन मिळत नसल्याने सध्या वाद सुरु आहे. ज्येष्ठ अभिनेते नाना पाटेकर यांनी याविषयी बोलताना महाराष्ट्र सरकारने मल्टिप्लेक्सना मराठी चित्रपटांच्या स्क्रिनिंगचा आदेश दिला असतानाही थिएटर मालक उल्लंघन का करत आहे ? असा प्रश्न विचारला आहे. आदेशाचं उल्लंघन करणा-यांवर सरकार कारवाई का करत नाहीये ? असंही त्यांनी विचारलं आहे. ट्विटरच्या माध्यमातून त्यांनी हे प्रश्न विचारले आहे. येत्या शुक्रवारी सलमान खान, कतरिनाचा 'टायगर जिंदा है' सोबत अंकुश चौधरीचा 'देवा' आणि 'गच्ची' हे दोन मराठी चित्रपट रिलीज होत आहे. पण 'देवा' आणि 'गच्ची' या दोन्ही चित्रपटांना सिनेमागृह मिळत नसल्याचं समोर आलं आहे. देवा सिनेमाला थिएटरर्स मिळत नसल्याने निर्मात्यांनी मनसेकडे धाव घेतली होती. 

Despite Maharashta Government directives to multiplexes about screening Marathi films, why are theatre owners not abiding by the same and why isn't the government taking appropriate action?

— Nana Patekar (@nanagpatekar) December 20, 2017

मुंबई आणि उपनगरांतील 22 तारखेचे सुमारे 98 टक्क्यांहून अधिक शो सलमान खानची मुख्य भूमिका असलेल्या ‘टायगर जिंदा हैं’च्या नावावर आहेत. चर्चेतून प्रश्न सुटला तर ठिक नाहीतर महाराष्ट्रात यशराजची शूटिंग होऊ देणार नाही असा इशारा महाराष्ट्र नवनिर्माण चित्रपट सेना अध्यक्ष अमेय खोपकर यांनी दिला आहे. देवा आणि गच्ची या दोन्ही मराठी चित्रपटांना स्क्रीन मिळत नसल्याने आधीच मनसेने थिएटर मालकांना मनसे स्टाईल आंदोलनाचा इशारा दिला होता. बुधवारी झालेल्या पत्रकार परिषदेत बोलताना त्यांनी जे कोणी मल्टिप्लेक्स मराठी चित्रपटांना स्क्रिन देत नसतील त्यांचा परवाना रद्द करावा अशी मागणी राज्य सरकारकडे केली आहे. 

मराठी चित्रपटासाठी भीक मागावं लागतं हे दुर्देवी असल्याची खंत अमेय खोपकर यांनी व्यक्त केली आहे. यशराज फिल्मचा मुजोरीपणा खपवून घेतली जाणार नाही. यशराजचं शुटिंग महाराष्ट्रात होतं हे लक्षात ठेवावं असा इशाराच त्यांनी यावेळी दिला. आंदोलनामुळे मराठी सिनेमांची पब्लिसिटी होत असेल, तर चूक काय? असा सवालही त्यांनी यावेळी विचारला. 

देवा आणि गच्चीला योग्य तो न्याय मिळावा अशी मागणी त्यांनी यावेळी केली. कोणत्याही स्थितीत देवाला थिएटर मिळणारच असा विश्वास त्यांनी यावेळी व्यक्त केला. मराठीवर अन्याय झाला तर खळखट्याक होणारच असंदेखील अमेय खोपकर म्हणाले आहेत. 

एकीकडे महाराष्ट्र नवनिर्माण सेनेने 'देवा' चित्रपटाला चित्रपटगृह मिळत नसल्याने थिएटर मालकांना इशारा दिला असताना मुंबई काँग्रेस अध्यक्ष संजय निरुपम यांनी मात्र यानिमित्ताने पुन्हा एकदा मनसेवर टीका केली आहे. मनसेच्या गुडांचा सामना करण्यासाठी बाऊन्सर ठेवावेत असा सल्ला संजय निरुपम यांनी थिएटर मालकांना दिला आहे. ट्विटरच्या माध्यमातून संजय निरुपम यांनी हे वक्तव्य केलं आहे. 

'मराठी चित्रपटाला प्रोत्साहन देणं गरजेचं आहे, पण मनसेने थिएटर मालकांना धमकी देणे स्विकार नाही. टायगर जिंदा है चित्रपटाच्या रिलीजसाठी पोलिसांनी सुरक्षा पुरवली पाहिजे अन्यथा मनसेच्या गुंडांचा सामना करण्यासाठी थिएटर मालकांनी बाऊन्सर ठेवावेत', असं संजय निरुपम म्हणाले आहेत. संजय निरुपम यांच्या वक्तव्यामुळे पुन्हा एकदा मनसे विरुद्ध काँग्रेस लढाई सुरु होणार आहे. याआधी परप्रांतीयांच्या मुद्यावरुन दोन्ही पक्ष आमने-सामने आले होते. 

देवा चित्रपटावरुन सुरु असलेल्या वादात आता शिवसेनेनेही उडी घेतली आहे. शिवसेना खासदार संजय राऊत यांनी ट्विटरच्या माध्यमातून 'देवा' चित्रपटाला समर्थन देत प्रत्येक मराठी चित्रपटाला थिएटर मिळायला हवे असं ठणकावून सांगितलं आहे. यावेळी संजय राऊत यांनी मराठी निर्मात्यांची अवस्था फेरीवाल्यांसारखी झाली आहे अशी खंतही बोलून दाखवली. 

मनसेनंतर नितेश राणे यांनीही सिनेमाला समर्थन दाखविलं. महाराष्ट्रामध्ये मराठी चित्रपटांचा स्वाभिमान राखलाच पाहीजे, असं आमदार नितेश राणे यांनी म्हंटलं आहे. महाराष्ट्रामध्ये ‘देवा’ ला मारुन टायगर जिंदा राहत असेल तर ते थिएटर्सना कुठलाच टायगर वाचवू शकणार नाही!!  महाराष्ट्रामध्ये मराठी चित्रपटांचा स्वाभिमान राखलाच पाहीजे!!, असं ट्विट नितेश राणे यांनी केलं आहे.

खिलाडी अक्षय कुमारनेही ट्विटरच्या माध्यमातून 'देवा' चित्रपट पाहण्याचं आवाहन केलं होतं. बॉलिवूड विरुद्ध मराठी असे दोन गट पडले असताना खिलाडी अक्षय कुमारने लोकांना 'देवा' चित्रपट पाहण्याचं आवाहन केलं आहे. अक्षय कुमार आणि सलमान खान खूप चांगले मित्र आहेत. मात्र अक्षयने ट्विट करत अंकुश चौधरीचा  'देवा' हा मराठी चित्रपट पाहण्याचं आवाहन केलं आहे. विशेष म्हणजे अक्षय कुमार मराठीत बोलला आहे. यावेळी त्याने प्रमोद फिल्म्स हे इंडस्ट्रीत आपले गॉडफादर असल्याचं सांगितलं आहे.

अक्षय व्हिडीओत सांगत आहे की, 'देव तारी त्याला कोण मारी.. प्रमोद फिल्म्स आणि देवा सिनेमाच्या पूर्ण टीमला माझ्या खूपखूप शुभेच्छा. पाहायला विसरु नका, देवा - एक अतरंगी.. तुमच्या जवळच्या थिएटर्समध्ये. जय हिंद जय महाराष्ट्र'.