मुंबई/अकोले (जि. अहमदनगर) : ऊसाला लागू असलेल्या एफआरपीच्या धर्तीवर दूध उत्पादक शेतकऱ्यांना हमीभाव देण्याचा सरकार प्रयत्न करेल. याबाबतचा मसुदा तयार करण्याचे काम तातडीने सुरू केले जाईल, आठवडाभरात दुधाचे दर वाढतील असे आश्वासन दुग्ध व्यवसाय विकास मंत्री सुनील केदार यांनी शुक्रवारी दूध उत्पादक शेतकरी आणि संघटनांच्या नेत्यांना दिले.
लाॅकडाऊनच्या काळात दुधाचे दर पडल्याने विविध संघटनांनी सध्या आंदोलनाचा पवित्रा घेतला आहे. या पार्श्वभूमीवर मंत्रालयात बैठक झाली. आमदार सदाभाऊ खोत, अनिल बोंडे, किसान सभेचे अजित नवले, किरण लहमटे यांच्यासह शेतकरी प्रतिनिधी उपस्थित होते. डेअरीला दूध दिल्याबरोबर पावती देण्याच्या आणि पावतीवरील मजकूर अंतिम करण्याच्या सूचना देण्यात येतील. पशुधनाच्या लसीकरणाला प्राधान्य देण्याचेही यावेळी ठरले.
दुधाचे दर तातडीने वाढविले जाणार असल्याने व एफआरपीचा कायदा करण्याचे धोरण घेतले जाणार असल्याने लढ्याचे एक पाऊल पुढे पडले आहे. - डॉ. अजित नवले, राज्य सचिव माकप किसानसभा