चुनाभट्टीमध्ये क्लीनअप मार्शल महिलेवर तरुणाकडून हल्ला

विनामास्क फिरणाऱ्यांवर कारवाई केल्याचा राग

लोकमत न्यूज नेटवर्क

मुंबई : विनामास्क फिरणाऱ्यांवर कारवाई करत असल्याच्या रागात चुनाभट्टीमध्ये क्लीनअप मार्शल महिलेवर तरुणाकडून हल्ला केल्याची घटना मंगळवाऱी सायंकाळी घडली. याप्रकरणी चुनाभट्टी पोलिसांनी गुन्हा नोंदवत अधिक तपास सुरू केला आहे.

या हल्ल्यात २४ वर्षीय क्लीनअप मार्शल जखमी झाल्या आहेत. मंगळवाऱी सायंकाळी ४ च्या सुमारास तक्रारदार या चेंबूर येथील छगन मिठा पेट्रोल पंप समोरील उमर्शी बाप्पा चौकात विनामास्क फिरणाऱ्यांवर कारवाई करत होते. या कारवाईमुळे मोहसीम वसीम शेखला पुढे जाता आले नाही. याच रागात मोहसीमने अश्लील शिवीगाळ सुरू केली. त्याला समजावत असताना मोहसीमने त्यांच्यासोबत असभ्य वर्तन केले. त्यानंतर हातातील हेल्मेटने त्यांच्या कपाळावर जोरात मारले. या हल्ल्यात त्या जखमी झाल्या आहेत. घटनेची माहिती मिळताच चुनाभट्टी पोलीस तेथे पोहोचले. त्यांनी मोहसीमला ताब्यात घेत चौकशी सुरू केली.

जखमी मार्शल यांना तत्काळ जवळच्या रुग्णालयात दाखल केले. याप्रकरणी त्यांच्या तक्रारीवरून रात्री विनयभंग, मारहाण, गुन्हा नोंदवत मोहसीमला अटक करण्यात आली आहे. मोहसीम हा वडाळा येथील रहिवासी असून उच्चशिक्षित आहेत. त्यांच्याकडे केलेल्या चौकशीत कामाच्या तणावात या कारवाईमुळे कोंडीत अडकल्यामुळे त्याने हे पाऊल उचलल्याचे पोलिसांना सांगितले.