आपले युद्ध फेब्रुवारीत - राज ठाकरे

आपण शिवरायांचे मावळे आहोत. युद्धात विजयासाठी सर्व शक्तीनिशी लढण्यास सज्ज झाले पाहिजे. बाकीच्या लोकांकडे खूप पैसे आहेत. आपण शिवरायांच्या नीतीने निवडणुकीची

मुंबई : आपण शिवरायांचे मावळे आहोत. युद्धात विजयासाठी सर्व शक्तीनिशी लढण्यास सज्ज झाले पाहिजे. बाकीच्या लोकांकडे खूप पैसे आहेत. आपण शिवरायांच्या नीतीने निवडणुकीची तयारी करून निवडणूक जिंकायची, असे प्रतिपादन महाराष्ट्र नवनिर्माण सेना अध्यक्ष राज ठाकरे यांनी बुधवारी सायंकाळी केले.
माझगाव ताडवाडी येथे भायखळा विधानसभा शाखा क्रमांक २१० (माझगाव गड)च्या लोकार्पण सोहळ्यात ते बोलत होते. या वेळी मनसे नेते बाळा नांदगावकर, मनसे सचिव अ‍ॅड. राजेंद्र शिरोडकर, विभाग अध्यक्ष विजय लिपारे, मनसे वाहतूक सेना अध्यक्ष संजय नाईक, भायखळा विभानसभा विभाग अध्यक्षा मेघना राणे, नगरसेवक समिता नाईक आदी उपस्थित होते.
सोहळ्याला माझगाव ताडवाडी येथील शिवनिनाद या ढोलपथकाने सलामी देत उपस्थितांची मने जिंकली. या वेळी ठाकरे यांनी उपस्थित पदाधिकारी आणि कार्यकर्त्यांना आगामी महापालिका निवडणुकीसाठी मार्गदर्शन करत शुभेच्छा दिल्या.
तसेच निवडणुकीत पैशांच्या लढाईत विजय सत्याचाच होतो. त्यामुळे आपला विजय ठाम आहे, असा विश्वास त्यांनी व्यक्त केला. (प्रतिनिधी)