मास्क न वापरणाऱ्या २०७ नागरिकांना दंड

लोकमत न्यूज नेटवर्क

नागपूर : महापालिकेच्या उपद्रव शोधपथकाच्या जवानांनी गुरुवारी मास्कशिवाय फिरणाऱ्या बेजबाबदार २०७ नागरिकांकडून १ लाख ३ हजार ५०० रुपयांचा दंड वसूल केला. या सर्व नागरिकांना मास्कसुद्धा देण्यात आले. मागील काही महिन्यांत शोधपथकांनी ३३,८५६ नागरिकांविरुद्ध कारवाई करून १ कोटी ५२ लाख ८७ हजारांचा दंड वसूल केला आहे.

कोरोना रुग्णांची संख्या पुन्हा वाढत चालली असून, कोरोना विषाणूचा संसर्गाचा अद्यापही धोका टळला नाही. आताही अनेक ठिकाणी सुरक्षित अंतर पाळत नसल्याचे दिसून येते. नागरी भागात तर ‍विनामास्क नागरिक फिरताना दिसतात, ही बाब घातक आहे.

उपद्रव शोधपथकाद्वारे लक्ष्मीनगर झोनअंतर्गत ६२, धरमपेठ १८, हनुमाननगर ११, धंतोली १०, नेहरुनगर २१, गांधीबाग २१, सतरंजीपुरा ९, लकडगंज १०, आशीनगर १२, मंगळवारी झोनअंतर्गत ३१ आणि मनपा मुख्यालयातील २ जणांविरुद्ध ही कारवाई शोधपथकाचे प्रमुख वीरसेन तांबे यांच्या मार्गदर्शनात करण्यात आली. ५०० रुपयेप्रमाणे आतापर्यंत २८,३८६ नागरिकांकडून १ कोटी ४१ लाख ९३ हजार वसूल करण्यात आले आहेत.