जुन्या वादातून दोघांवर प्राणघातक हल्ला

गिट्टीखदान आणि कळमन्यामध्ये गुन्हे

नागपूर : गिट्टीखदान आणि कळमना पोलीस ठाण्याच्या हद्दीत दोघांवर प्राणघातक हल्ला करून आरोपींनी त्यांना गंभीर जखमी केले. गिट्टीखदानमधील जखमीचे नाव शहजाद खान हाफिज खान (वय २१)आहे. त्याच्यासोबत आरोपी सूरज आनंद मुरमुरे (वय २६) याचा वाद आहे. त्यातून रविवारी रात्री ७ च्या सुमारास आरोपी मुरमुरेने शहजादवर चाकूने हल्ला चढवला. दोन वार चुकविल्यानंतर तिसरा वार पायावर लागल्याने शहजाद जबर जखमी झाला. गवळीपुऱ्यात घडलेल्या या घटनेने वातावरण गरम झाले. शहजादच्या तक्रारीवरून गिट्टीखदान पोलिसांनी गुन्हा दाखल केला. पुढील तपास सुरू आहे.

दुसरी घटना कळमन्यातील नाका नंबर चारजवळ रविवारी दुपारी घडली. राजू निंबाजी सोनकुसरे आणि हरी श्रीराम सोनकुसरे हे दोघे रविवारी दुपारी पूजेचे सामान घेऊन घराकडे जात असताना कळमन्यातील नागराजनगर महादेव घोडेवाल्याच्या घराजवळ बाप्या नामक आरोपीने त्यांना रोखले. बाप्याने हरीला मारहाण सुरू केली. ते पाहून राजू वाचवण्यासाठी गेला असता बाप्याने लाकडी दांड्याने हल्ला चढवून त्याला गंभीर जखमी केले. तर बाप्याच्या आईने त्याला चपलेने मारहाण केली. राजूच्या तक्रारीवरून कळमना पोलिसांनी आरोपी बाप्या आणि त्याच्या आईविरुद्ध गुन्हा दाखल केला.

----