रक्तदान करून महामानवाला अभिवादन

नागपूर : काेराेनाच्या महामारीमुळे परिस्थिती भयंकर झाली असून, वैद्यकीय सेवा डगमगायला लागली आहे. या परिस्थितीत रुग्णालयात रक्ताचाही तुटवडा जाणवत आहे. अशावेळी तरुणांनी पुढाकार घेत रक्तदान अभियान चालविले आहे. महामानव डाॅ. बाबासाहेब आंबेडकर यांच्या जयंतीचे औचित्य साधून भव्य रक्तदान शिबिराचे आयाेजन केले जात आहे.

प्रियदर्शी सम्राट अशाेक बहुउद्देशीय संस्थेच्या तरुणांनी जयंतीनिमित्त बुधवारी रक्तदान शिबिर आयाेजित केले. संस्थेचे संयाेजक अनिकेत कुत्तरमारे यांनी सांगितले, यापूर्वीही १४ ऑक्टाेबर, २५ ऑक्टाेबर, ६ डिसेंबर आणि सावित्रीबाई फुले यांच्या जयंतीचे औचित्य साधून दक्षिण नागपुरातील विविध विहारांमध्ये रक्तदान शिबिराचे आयाेजन करण्यात आले हाेते. त्यातून रक्ताच्या १८० पिशव्यांचा पुरवठा मेडिकल रुग्णालयाला करण्यात आला. मेडिकल प्रशासनाकडूनही रक्ताची गरज असल्याचे सांगून रक्तदान करण्याचे आवाहन करण्यात आले. आता पुन्हा १४ एप्रिल राेजी कुकडे ले-आउट परिसरात भव्य रक्तदान शिबिराचे आयाेजन करून ५० पिशव्या रक्त गाेळा करण्यात आले. अजनी पोलीस स्टेशनचे एपीआय शीतलकुमार गायकवाड, तहसीलदार प्रताब वाघमारे, रिपब्लिक मुव्हमेंटचे नरेश वाहने, यशवंत बागडे आदी प्रामुख्याने उपस्थित हाेते. महामानवाच्या जयंतीनंतरही रक्तदानाचे अभियान सातत्याने घेण्याचा निर्धार अनिकेतने ‘लाेकमत’शी बाेलताना केला. आयोजनात सिद्धार्थ बनसोड, वैशाली गुटके, शुभम दामले, मीनल मेश्राम, दीक्षिता बनसोड, शीतल गडलिंग, प्रशिक वाहने आदींचा सहभाग हाेता.

१३० बुद्ध विहारांमध्ये वृक्षाराेपण

महामानव डाॅ. बाबासाहेब आंबेडकर यांच्या १३०व्या जयंती दिनी समता सैनिक दलाच्या माध्यमातून शहरातील १३० बुद्ध विहारांमध्ये वृक्षाराेपण करण्याचा निर्धार करण्यात आला आहे. दलाचे सैनिक प्रशिक वाहने यांनी सांगितले, १२, १३ आणि १४ एप्रिल राेजी विविध बुद्ध विहारांमध्ये हे अभियान राबविले. माेजक्या लाेकांच्या उपस्थितीत कोरोनासंबंधी नियम पाळून वृक्षाराेपण करण्यात आले.