नागपुरात म्युकरमायकोसिसचा वाढला धोका

Increased risk of Mucormycosis infarction कोरोना नियंत्रणात येत असताना म्युकरमायकोसिसचा धोका वाढल्याने चिंतेचे वातावरण आहे. मागील आठ दिवसात १५९ नव्या रुग्णांची नोंद झाली असून १७ रुग्णांचा जीव गेला आहे.

ठळक मुद्देआठ दिवसात १५९ रुग्ण, १७ मृत्यू : रुग्णसंख्या १३६९ तर मृतांची संख्या १२८

लोकमत न्यूज नेटवर्क 

नागपूर : कोरोना नियंत्रणात येत असताना म्युकरमायकोसिसचा धोका वाढल्याने चिंतेचे वातावरण आहे. मागील आठ दिवसात १५९ नव्या रुग्णांची नोंद झाली असून १७ रुग्णांचा जीव गेला आहे. नागपूर जिल्ह्यात म्युकरमायकोसिस रुग्णांची संख्या १,३६९ झाली आहे, तर मृतांची संख्या १२८ वर गेली आहे. शनिवारी १९ नवे रुग्ण व २ मृत्यू नोंदविण्यात आले.

म्युकरमायकोसिसच्या वाढत्या धोक्याविषयी आरोग्य विभागाने गंभीर इशारा दिला आहे. म्युकरमायकोसिस हा संसर्गजन्य आजार नाही. मात्र, मधुमेह असलेल्या किंवा कोरोनाच्या उपचारादरम्यान मधुमेह झालेल्यांमध्ये म्युकरमायकोसिसचे रुग्ण आढळून येत असल्याचे तज्ज्ञाचे म्हणणे आहे. म्युकरमायकोसिसला दूर ठेवण्यासाठी रक्तातील साखरेचे योग्य व्यवस्थापन करण्याचा सल्ला दिला जात आहे. नागपूर जिल्ह्यात म्युकरमायकोसिसचे एप्रिल महिन्यापासून रुग्ण वाढायला लागले असले तरी रुग्णांची संख्या कमी होती. परंतु मे महिन्यात मोठ्या संख्येत रुग्ण आढळून आल्याने मेयो, मेडिकलला या आजाराच्या स्वतंत्र वॉर्डाची सोय करण्याची गरज पडली. धक्कादायक म्हणजे, ४ जून रोजी नागपूर जिल्ह्यात या आजाराचे १२१० रुग्ण व १११ मृत्यू असताना आठ दिवसात म्हणजे, १२ जून रोजी रुग्णसंख्या वाढून १३६९ झाली असून मृतांचा आकडा १२८वर पोहचला आहे. मृतांच्या वाढलेल्या संख्येमागे अनेक कारणांपैकी ‘अ‍ॅम्पोटेरीसीन बी लायपोसोमल’चा तुटवडा, हे कारण दिले जात आहे. सध्या ४८१ रुग्ण उपचाराखाली आहेत.

९९३ रुग्णांवर शस्त्रक्रिया

शासकीय रुग्णालयात आतापर्यंत ४४२ रुग्णाची नोंद व २५ मृत्यू तर, खासगी रुग्णालयात ९२७ रुग्णांची नोंद व १०३ मृत्यू झाले आहेत. १३६९ रुग्णांमधून ७६० रुग्ण बरे झाले आहेत. ९९३ रुग्णांवर शस्त्रक्रिया झाल्या आहेत. सध्या शासकीय रुग्णालयात २९७ तर खासगी रुग्णालयात १८४ असे एकूण ४८१ रुग्ण उपचाराखाली आहेत.