चिमुकल्याला शेजारच्या घरी ठेवून आईने केली आत्महत्या; मोठी मुलगी अंगणात होती खेळत

Nagpur News पती कामावर तर माेठी मुलगी खेळायला गेल्याचे पाहून महिलेने तिच्या १४ महिन्यांच्या बाळाला शेजारी नेवून ठेवले व घरी आल्यानंतर गळफास लावून घेत आत्महत्या केली.

ठळक मुद्देआत्महत्येचे कारण अस्पष्ट

लाेकमत न्यूज नेटवर्क

नागपूर : पती कामावर तर माेठी मुलगी खेळायला गेल्याचे पाहून महिलेने तिच्या १४ महिन्यांच्या बाळाला शेजारी नेवून ठेवले व घरी आल्यानंतर गळफास लावून घेत आत्महत्या केली. ही घटना बुटीबाेरी शहरात रविवारी (दि. २१) सायंकाळी ४ वाजताच्या सुमारास उघडकीस आली. तिच्या आत्महत्येचे कारण मात्र कळू शकले नाही.

प्रिया प्रमोद बारसागडे (२७, रा. भंडारा) असे मृत महिलेचे नाव असून, पती बुटीबाेरी (ता. नागपूर ग्रामीण) येथे खासगी कंपनीत नाेकरी करीत असल्याने ती पती व मुलांसाेबत बुटीबाेरी शहरातील जुन्या वसाहतीत किरायाने राहायची. तिला आठ वषाची मुलगी आणि १४ महिन्याचा मुलगा आहे. प्रिया व प्रमाेद यांचा विवाह २०१३ मध्ये झाला हाेता. तिने रविवारी सकाळी पतीला जेवणाचा डबा तयार करून दिला व ताे कामावर निघून गेला. दुपारच्या सुमारास मुलगी घराबाहेर खेळायला गेली हाेती.

दरम्यान, तिने चिमुकल्याला शेजारी नेऊन ठेवले व घरातील कामे आटाेपल्यावर त्याला घ्यायला येते, अशी सूचनाही तिने शेजाऱ्यांना केली. सायंकाळी ४ वाजताच्या सुमारास मुलगी घरी गेली, तेव्हा तिला तिची आई छताला लटकलेल्या अवस्थेत आढळून आली. ती रडत बाहेर येताच हा प्रकार शेजाऱ्यांच्या लक्षात आला. त्यांनी प्रमाेदसह पाेलिसांना माहिती दिली. पाेलिसांनी घटनास्थळ गाठून मृतदेह उत्तरीय तपासणीसाठी पाठविला. घरी सर्व सुरळीत सुरू हाेते, अशी माहिती पती प्रमाेदने दिली असून, त्याला शेजाऱ्यांनी दुजाेरा दिला. असे असताना प्रियाने आत्महत्या का करावी, हे सध्यातरी अनाकलनीय आहे. याप्रकरणी बुटीबाेरी पाेलिसांनी अकस्मात मृत्यूची नाेंद करून तपास सुरू केला आहे.