कामठीत एकतर्फी प्रेमातून तरुणीवर जीवघेणा हल्ला

कामठी : नवीन कामठी पोलीस स्टेशन हद्दीतील ग्रीन टाऊन, लेखानगर परिसरात एकतर्फी प्रेमातून तरुणीवर जीवघेणा हल्ला करण्यात आला. याप्रकरणी आरोपी तरुणास अटक करण्यात आली आहे. पोलिसांनी दिलेल्या माहितीनुसार आरोपी निखिल प्रकाश वानखेडे (२५) रा. गांगापूर, उमरेड हा कामठी नागपूर-मार्गावरील आसाराम नर्सिंग महाविद्यालयात नर्सिंगचे शिक्षण घेत आहे. याच परिसरातील २३ वर्षीय तरुणीही येथे नर्सिंगचे शिक्षण घेत आहे. महाविद्यालयाच्या मागील लेखानगर येथे ते वास्तव्यास आहे. निखिल हा गत दोन वर्षापासून सदर तरुणीवर एकतर्फी प्रेम करतो. या संदर्भात तरुणीने आपल्या कुटुंबातील सदस्यांना निखिलकडून देण्यात येणाऱ्या त्रासाबद्दल माहिती दिली होती. यानंतर कुटुंबातील सदस्यांनी निखिल विरोधात उमरेड पोलीस स्टेशनला तक्रार सुद्धा दाखल केली होती. उमरेड पोलिसांनी त्याच्यावर प्रतिबंधक कारवाई करून समजूत घातली होती. परंतु त्याच्यात कोणत्याही प्रकारचा बदल झाला नाही. १४ फेब्रुवारीच्या मध्यरात्री १२ वाजता सुमारास निखिल हा सदर तरुणीच्या ग्रीन टाऊन लेखानगर परिसरातील रूमवर पोहोचला. तिथे गोंधळ घालत त्याने तरुणीला मारहाण केली व गळा दाबून जीवे मारण्याचा प्रयत्न केला. सदर तरुणीने आरडाओरड केल्याने शेजारी धावून आले. त्यामुळे पुढील अनर्थ टळला. या प्रकरणी १५ फेब्रुवारीला तरुणीने नवीन कामठी पोलीस स्टेशनला निखिल याच्या विरोधात पोलिसात तक्रार केली. पोलिसांनी निखिल विरुद्ध भादंवि कलम ३०७, ३४१, ३५४,(अ), ५०६, ५०४, ४५४ नुसार गुन्हा दाखल करून निखिल यास अटक केली. पोलिसांनी आरोपीला कामठी येथील प्रथम सत्र न्याय दंडाधिकारी डी.आर.भोळा यांचे न्यायालयात हजर केले. न्यायालयाने त्याला पाच दिवसाची पोलीस कोठडी ठोठावली आहे. ही कारवाई ठाणेदार संजय मेंढे यांच्या मार्गदर्शनात दुयम पोलीस निरीक्षक सुरेश कन्नाके यांनी केली.