दुचाकी थांबवून मोबाईल हिसकावणाऱ्या आरोपीला २४ तासात बेड्या

आरोपीसोबत एका विधीसंघर्षग्रस्त बालकाचा यात समावेश आहे.

नागपूर : मित्राच्या मुलाचे लग्न आटोपून घरी परत येणाऱ्या व्यक्तीला अडवून त्याचा मोबाईल हिसकावून पळ काढणाऱ्या आरोपीला हुडकेश्वर पोलिसांनी २४ तासात गजाआड केले आहे. आरोपीसोबत एका विधीसंघर्षग्रस्त बालकाचा यात समावेश आहे.

अमित मनोज पाटील (१९, रा. प्लॉट नं. १९४, जयहिंदनगर, संजुबा शाळेमागे, हुडकेश्वर) आणि एक विधीसंघर्षग्रस्त बालक असे अटक करण्यात आलेल्या आरोपीचे नाव आहे. महेश पंढरीनाथ सुहागपुरे (५३, रा. स्वागतनगर, न्यु नरसाळा) हे आपल्या मित्राच्या मुलाच्या लग्नासाठी उमरेड रोडवरील कान्हा सेलिब्रेशनमध्ये गेले होते. लग्न आटोपून ते दुचाकीने आपल्या घरी परत येत होता. उमरेड रोडवर बहादुरा फाटाजवळ आरोपी अमित आणि त्याचा साथीदार विधीसंघर्षग्रस्त बालकाने महेश यांना थांबविले. दोघांनी त्यांच्या खिशातील ८ हजार रुपये किमतीचा मोबाईल हिसकावून पळ काढला. या प्रकरणी महेश यांच्या तक्रारीवरून हुडकेश्वर पोलिसांनी अज्ञात आरोपीविरुद्ध कलम ३९२, ३४ नुसार गुन्हा दाखल केला होता. पोलिसांनी घटनास्थळाची पाहणी करून तांत्रीक तपास करीत आरोपी अमितला ताब्यात घेतले असता त्याने आपला साथीदार विधीसंघर्षग्रस्त बालकासोबत चोरी केल्याची कबुली दिली. त्याच्या ताब्यातून चोरी केलेला मोबाईल जप्त करण्यात आला आहे.