चालकास झाडाला बांधले : बोरगाव शिवारातील घटना मौदा : चार अनोळखी चोरट्यांनी पाठलाग करून ट्रक अडविला आणि ट्रकचालकास रोडच्या कडेला असलेल्या झाडाला बांधून ट्रकमधील साहित्य लंपास केले. चोरून नेलेल्या साहित्याची एकूण किंमत २ लाख ६१ हजार ४०० रुपये आहे. ही घटना मौदा पोलीस ठाण्याच्या हद्दीतील नागपूर - भंडारा महामार्गावरील बोरगाव शिवारात मंगळवारी मध्यरात्री २.१५ वाजताच्या सुमारास घडली. फिर्यादी ट्रकचालक भुवनेश्वर जयपाल परसगाये (४०, रा. पंचशील चौक, देवरी, जिल्हा गोंदिया) हा मंगळवारी रात्री सीजी-०४/जेए-९३८४ क्रमांकाचा ट्रक घेऊन देवरीहून नागपूरकडे येत होता. या ट्रकमध्ये १०० नग सळाकी होत्या. दरम्यान, बोरगाव शिवारात त्याच्या ट्रकमधील डिझेल संपल्याने त्याने ट्रक रोडच्या कडेला उभा केला आणि ट्रकच्या केबिनमध्ये झोपी गेला. मध्यरात्रीच्या सुमारास चार अनोळखी तरुण या ट्रकजवळ आले आणि त्यांनी केबिनचे दार ठोठावले. त्यामुळे भुवनेश्वर यांनी दार उघडताच या चौघांपैकी एकाने त्यांना चाकूचा धाक दाखविला तर दुसऱ्याने त्यांच्या डोळ्यावर पट्टी बांधली. तसेच या चौघांनी त्याला रोडच्या कडेला असलेल्या झाडाला दोरीने बांधून ठेवले. त्यानंतर या चौघांनीही ट्रकमधील साहित्य चोरून नेले. यात चोरट्यांनी २ लाख ५० हजार रुपये किमतीच्या पाच टन सळाकी, सात हजार रुपये किमतीची बॅटरी, २,६०० रुपये किमतीचा प्रेशर जॅक आणि १,८०० रुपये किमतीची निळी ताडपत्री असा एकूण २ लाख ६१ हजार ४०० रुपये किमतीचा मुद्देमाल चोरून नेला. या प्रकरणी मौदा पोलिसांनी भादंवि ३४२, ३६५, ३९२, ३४ अन्वये गुन्हा दाखल करून तपास सुरू केला आहे. (प्रतिनिधी)
चोरट्यांनी ट्रक पळविला
By admin | Published: January 02, 2017 2:37 AM