मनमाडला एफसीआयजवळ ट्रकच्या धडकेने बोगी घसरली

मनमाड : शहरात असलेल्या भारतीय अन्नधान्य महामंडळाच्या (एफसीआय) साठवणूक गोदामाजवळ शुक्रवारी (दि. ८) दुपारी २:३०च्या सुमारास मालवाहतूक करणारी रेल्वे आणि गोदामात माल भरण्यासाठी आलेला ट्रक यांच्यात अपघात झाला. या अपघातातरेल्वे मालगाडीची एक बोगी (वॅगन) लोहमार्गावरून घसरली. सुदैवाने या अपघातात ट्रकचालकाचे प्राण वाचले आहेत.

 

याबाबत अधिक माहिती अशी की, शहरातील भारतीय अन्नधान्य महामंडळाच्या गोदाम क्रमांक २४ जवळ दुपारी महामंडळामधील रिकाम्या बोगी (वॅगन) एकत्रित असताना माघारी येणाऱ्या मालगाडीतील माल भरण्यासाठी आलेला ट्रक क्रमांक (एमएच १८, बीए ०३६९) हा मालगाडीवर येऊन आदळला. हा ट्रक गोदामाकडे फाळके उघडे करून येत असताना चालकाचे नियंत्रण सुटून हा अपघात झाला असल्याची माहिती प्रत्यक्षदर्शींनी दिली. यावेळी कर्मचाऱ्यांनी तातडीने गोदामात धाव घेत ट्रकचालकाला बाहेर काढून त्याचे प्राण वाचले.