रोकडोबावाडीत तामिळनाडूच्या चोरट्यांचा मुक्काम!

तामिळनाडू राज्यातील मूळ रहिवासी असलेल्या मोबाइल चोरट्यांच्या टोळीने मागील काही दिवसांपासून देवळाली गावाजवळील वालदेवी पुलालगतच्या रोकडोबावाडीत मुक्काम ठोकला होता. या टोळीतील चोरांच्या संशयास्पद हालचालींवरून पोलिसांनी त्यांच्यावर पाळत ठेवत पर्दाफाश केला. अर्धा डझन चोरांना पोलिसांनी बेड्या ठोकून त्यांच्या ताब्यातील ५४ मोबाइल हस्तगत केले आहेत.

ठळक मुद्दे५४ मोबाइल जप्त : आंतरराज्य टोळीचा पोलिसांनी लावला छडा

नाशिकरोड : तामिळनाडू राज्यातील मूळ रहिवासी असलेल्या मोबाइल चोरट्यांच्या टोळीने मागील काही दिवसांपासून देवळाली गावाजवळील वालदेवी पुलालगतच्या रोकडोबावाडीत मुक्काम ठोकला होता. या टोळीतील चोरांच्या संशयास्पद हालचालींवरून पोलिसांनी त्यांच्यावर पाळत ठेवत पर्दाफाश केला. अर्धा डझन चोरांना पोलिसांनी बेड्या ठोकून त्यांच्या ताब्यातील ५४ मोबाइल हस्तगत केले आहेत.

रोकडोबावाडीत नव्याने वास्तव्यास आलेल्या परप्रांतीय तरुणांच्या हालचाली आणि वर्तणुकीवर येथील रहिवाशांना संशय आला. याबाबतची गोपनीय माहिती उपनगर पोलीस ठाण्यातील गुन्हे शोध पथकाचे कर्मचारी प्रजित ठाकूर यांना मिळाली. ठाकूर यांनी या माहितीवरून बारकाईने खातरजमा केली. वरिष्ठ पोलीस निरीक्षक अनिल शिंदे, कुंदन जाधव, उपनिरीक्षक विकास लोंढे, अतुल पाटील, अशोक साळवे, गणेश भागवत आदींच्या पथकाने शनिवारी (दि.७) संध्याकाळी साडेसात वाजेच्या सुमारास रोकडोबावाडी येथे संशयितांच्या घरी छापा टाकला. यावेळी पोलीस पथकाला नाशिकसह जळगाव व इतर जिल्ह्यांतून या चोरट्यांनी लांबविलेले नागरिकांचे ५४ मोबाइल आढळून आले. याप्रकरणी पोलिसांनी संशयित मुरली मुरुगुन (२४), जगदीशन पल्लानी (३०), व्यंकटेश शंकर (३३), मंगेश पेरूमल (३०), मोहन रंगन (३०), आरमुघम सुब्रमणी (३३, सर्व. रा.वेल्लूर) या सहा संशयितांना अटक केली.

---इन्फो--

जळगावातून नाशिकला स्थलांतर

नाशिक, जळगाव व इतर जिल्ह्यांतील या आंतरराज्यीय मोबाइल चोरी करणाऱ्या टोळीकडून ५४ मोबाइल जप्त करण्यात पोलिसांना यश आले आहे. संशयित हे काही दिवसांपूर्वीच जळगाव येथून नाशिकरोडला आल्याचे त्यांच्याकडे मिळालेल्या रेल्वे तिकिटावरून स्पष्ट झाले आहे. हे सहा संशयित चोरटे रोकडोबावाडीसारख्या स्लम परिसरात वास्तव्य करण्यास प्राधान्य देत होते. जेणेकरून त्यांच्या वागण्यावर कोणालाही संशय येऊ नये.

---इन्फो---

उत्तर महाराष्ट्रातील मोबाइल चोरी; तामिळनाडूमध्ये विक्री

सकाळच्या सुमारास घराबाहेर फेरफटका मारण्यासाठी किंवा पालेभाज्या, दूध खरेदीसाठी बाहेर पडणाऱ्या नागरिकांवर पाळत ठेवत आणि त्यांच्या घरांमधून मोबाइल लंपास करीत असल्याचे पोलिसांनी सांगितले. दरम्यान, चोरलेले मोबाइल तामिळनाडूमधील विविध शहरांमध्ये कमी किमतीत या टोळीकडून विक्री केले जात होते. संशयितांची तमिळ मातृभाषा असल्यामुळे पोलिसांना चौकशी करताना काही प्रमाणात अडथळा निर्माण होत आहे.