महिला डॉक्टरच्या प्रेमात पडला पेशंट, उपचारांसाठी रोज येऊ लागला रुग्णालयात, अखेर...

One Side Love: रुग्णालयामध्ये उपचारांसाठी आलेला एक रुग्ण महिला डॉक्टरच्या प्रेमात पडला. या डॉक्टरला पाहण्यासाठी तो एक दिवस आड आजारी पडल्याचे नाटक करून रुग्णालयात येऊ लागला.

कामपूर - उत्तर प्रदेशमधील कानपूरमधून एकतर्फी प्रेमाचा एक विचित्र प्रकार समोर आला आहे. येथील हॅलेट रुग्णालयामध्ये उपचारांसाठी आलेला एक रुग्ण महिला डॉक्टरच्या प्रेमात पडला. या डॉक्टरला पाहण्यासाठी तो एक दिवस आड आजारी पडल्याचे नाटक करून रुग्णालयात येऊ लागला. ही डॉक्टर जिथे ड्युटीवर असेल तिथे तो पोहोचू लागला. दरम्यान, १५ दिवस हा क्रम चालू राहिल्यानंतर संबंधित महिला डॉक्टरला संशय आला. तिने याची तक्रार वरिष्ठांकडे केली. त्यानंतर हॅलेट रुग्णालयातील सुरक्षारक्षकांनी या रंगेल पेशंटला पकडले आणि त्याची जोरदार धुलाई केली. मग त्याला पोलिसांच्या हवाली केले. 

पकडल्यानंतर हा तरुण म्हणाला की मी तर रुग्णालयात औषध घेण्यासाठी गेलो होतो. आता पुन्हा तिकडे जाणार नाही. मिळालेल्या माहितीनुसार कानपूरच्या जाजमऊ येथील रहिवासी तौहिद हा पंधरा दिवसांपूर्वी आजारी पडला होता. तेव्हा तो हॅलेट रुग्णालयात उपचारांसाठी आला होता. त्यावेळी ओपीडीमध्ये मेडिकल कॉलेजमधील ज्युनियर डॉक्टर रुग्णांवर उपचार करत होती. तिने तौहिदवरही उपचार केले.

तिने तौहिदला काही औषधे लिहून दिली. मात्र या डॉक्टरला पाहून तौहिद विरघळला. तो तिच्या प्रेमात पडला. त्यानंतर दर एक दिवस आड करून तो उपचारांसाठी रुग्णालयात येऊ लागला. अनेकदा त्याने वेगवेगळ्या नावांने ओपीडीची पावती तयार करून घेतली. तसेच ही महिला डॉक्टर जेव्हा रुग्णालयात ड्युटीवर नसायची तेव्हा तो इतर डॉक्टरांना याबाबत विचारायचा.

दरम्यान, तौहिदचा इरादा समजल्याचवर ज्युनियर महिला डॉक्टरने याबाबत वरिष्ठ डॉक्टरांकडे तक्रार केली. शनिवारी तौहिद पुन्हा एकदा ओपीडीची पावती करून ओपीडीमध्ये पोहोचला तेव्हा स्टाफ सतर्क होता. त्याने ज्युनियर डॉक्टरबाबत विचारणा करताच स्टाफने त्याची धुलाई केली. तसेच त्याला पोलिसांच्या ताब्यात दिले.