Commonwealth Games 2022 : भारताच्या अजय सिंगने सर्वस्वी पणाला लावले, १ किलोच्या फरकाने पदक हुकले; पण, पाकिस्तानी स्पर्धकाला लोळवले

Commonwealth Games 2022 Weighlifting Ajay Singh :  राष्ट्रकुल क्रीडा स्पर्धेत भारतीय वेटलिफ्टर्सनी पदकाचा सपाटा कायम राखला आहे. ३ गोल्ड, २ रौप्य व १ कांस्य अशा सहा पदकांत आता आणखी एक भर पडेल असे आश्वासक चित्र अखेरच्या टप्प्यापर्यंत होते. ८१ किलो वजनी गटाच्या स्पर्धेत भारताच्या अजय सिंगने पदकासाठी  सर्वस्व पणाला लावले, परंतु १ किलोच्या फरकाने त्याचे कांस्यपदक हुकले. दरम्यान, लॉन बॉल स्पर्धेत भारताच्या चार सदस्यीय महिला संघानेही उपांत्य फेरीत न्यूझीलंडवर १६-१३ असा चुरशीचा विजय मिळवून या क्रीडा प्रकारातील पहिले पदक निश्चित केले आहे. 

८१ किलो वजनी गटात भारताच्या अजय सिंगने स्नॅच प्रकारात पहिल्या दोन प्रयत्नात १३७ व १४० किलोचा भार उचलला आहे.  तीन प्रयत्नांअंती अजय सिंग १४३ किलो भार उचलून दुसऱ्या क्रमाकांवर राहिला. ऑस्ट्रेलियाच्या कायले ब्रुसचा १४७ किलोचा प्रयत्न अयशस्वी ठरला अन् त्याला पहिल्या प्रयत्नातील १४३ किलो वजनावर समाधान मानवे लागले. इंग्लंडच्या क्रिस मरेने १३८, १४१ व १४४ किलो असा भार वाढवून स्नॅच प्रकारात अव्वल  स्थान कायम राखले. अजय व कायले हे १ किलोच्या फरकाने दुसऱ्या क्रमांकावर राहिले. 

स्नॅच प्रकारात १३५ किलोवर समाधानी राहिलेल्या पाकिस्तानच्या हैदर अलीने क्लिन अँड जर्कमध्ये १७० किलो वजन उचलून एकूण ३०५ किलोसह अव्वल स्थान पटकावले. पण, भारताच्या अजयने पहिल्याच प्रयत्नात १७२ किलो भार उचलताना ३१५ किलोसह आघाडी घेतली. क्लिन अँड जर्कच्या दुसऱ्या प्रयत्नात अजने स्वतःसमोर १७६ किलोचे लक्ष्य ठेवले. कारण, इंग्लंडच्या क्रिस मरेने १७४ किलो उचल करून ३१८ किलो वजनासह अव्वल क्रमांकावर झेप घेतली. त्यापाठोपाठ ऑस्ट्रेलियाच्या ब्रुसने १७५ किलो भार उचलला व त्याचेही एकूण ३१८ किलो झाले.  अजयने दुसऱ्या प्रयत्नात १७६, तर मरेने १७८ किलो भार उचलल्याने दोघांची एकूण किलो संख्या अनुक्रमे ३१९ व ३२२अशी झाली. ब्रुसने १८० किलो भार उचलून ३२३ सह आघाडी घेतली. कॅनडाच्या निकोलस वाचोनच्या १८० किलो भार उचलल्याने भारताचा अजय चौथ्या स्थानी सरकला. अखेरच्या प्रयत्नात अजयला 180 किलो भार उचलण्यात अपयश आले अन् थोडक्यात भारताचे पदक हुकले.

१७ एप्रिल १९९७ मध्ये राजस्थान येथे जन्मलेल्लाय अजयने धावपटू म्हणून क्रीडा कारकीर्दिची सुरुवात केली होती, परंतु आर्मीमध्ये असलेल्या त्याच्या काकांनी त्याला वेटलिफ्टिंग करण्याचा सल्ला दिला. त्याला तोपर्यंत वेटलिफ्टिंग खेळ अस्तित्वात आहे, हेही माहीत नव्हते. त्यामुळे त्याच्या तांत्रिक बाजू समजून घेण्यासाठीच त्याला २-३ वर्ष लागली. सुबेदार राजेंदर यांनी त्याला मदत केली.  २०१५मध्ये सर्वप्रथम त्याने राष्ट्रीय स्पर्धेत पहिले पदक पटकावले आणि त्यानंतर मागे वळून पाहिले नाही. २०१९ व २०२१च्या राष्ट्रकुल सीनियर चॅम्पियनशीप स्पर्धेत त्याने पदक जिंकले. 
२०१९मध्ये अजयने एकूण ३१८ ( १४८+१९०) वजय उचलून राष्ट्रीय विक्रम नावावर केला होता.   राष्ट्रकुल अजिंक्यपद स्पर्धेची दोन सुवर्णपदकं त्याच्या नावावर आहेत. त्याने तष्कंतला २०२१ मध्ये झालेल्या स्पर्धेत ३२२ किलो भार उचलून स्वतःचाच राष्ट्रीय विक्रम मोडला.