गोल्ड मेडल स्वीकारताना भारताचा तिरंगा पाहून चानूच्या डोळयात तरळले अश्रू, वेटलिफ्टिंगमध्ये 22 वर्षानंतर भारताला मिळाले पदक

वर्ल्ड वेटलिफ्टिंग चॅम्पियनशिप स्पर्धेत साईखोम मीराबाई चानूने 194 किलो वजन उचलून नवीन विश्वविक्रम रचला आहे.

ठळक मुद्देचानूच्या आधी कर्णम मल्लेश्वरीने 1994 आणि 1995 साली गोल्ड मेडल मिळवले होते.पोडियमवर पदक स्विकारण्यासाठी उभं राहिल्यानंतर भारताचा तिरंगा पाहून चानूच्या डोळयात अश्रू तरळले.

नवी दिल्ली - वर्ल्ड वेटलिफ्टिंग चॅम्पियनशिप स्पर्धेत साईखोम मीराबाई चानूने 194 किलो वजन उचलून नवीन विश्वविक्रम रचला आहे. या कामगिरीसह चानूने सुवर्णपदकाला गवसणी घातली. अशी कामगिरी करणारी चानू दुसरी भारतीय वेटलिफ्टर आहे. 22 वर्षांपूर्वी कर्णम मल्लेश्वरीने भारताकडून पहिली वर्ल्ड चॅम्पियन बनली होती. 

अमेरिकेतील अनहिम येथे आयोजित वर्ल्ड चॅम्पियनशिप स्पर्धेत चानूने 48 किलो वजनी गटात पहिल्यांदा 85 किलो आणि दुस-यांना 109 किलो वजन उचलून सुवर्णपदकावर नाव कोरले. चानूच्या आधी कर्णम मल्लेश्वरीने 1994 आणि 1995 साली गोल्ड मेडल मिळवले होते. मल्लेश्वरीने सिडनी ऑलिम्पिकमध्ये वेटलिफ्टिंगमध्ये कांस्यपदकही मिळवले होते. 

पोडियमवर पदक स्विकारण्यासाठी उभं राहिल्यानंतर भारताचा तिरंगा पाहून चानूच्या डोळयात अश्रू तरळले. थायलंडच्या सुकचारोन तुनियाने रौप्य आणि सेगुराने इरिसने कांस्यपदक पटकावले. डोपिंगच्या प्रकरणामुळे रशिया, चीन, कझाकस्ता, युक्रेन आणि अझरबैजान या देशाचे वेटलिफ्टर्स स्पर्धेत सहभागी झाले नव्हते. 

रियो ऑलिम्पिकमध्ये चानूने अत्यंत निराशाजनक प्रदर्शन केले होते. 48 किलो वजनी गटात क्लीन आणि जर्कच्या तीन प्रयत्नात चानू अपयशी ठरली होती. पण यावर्षी चानूने आपल्या कामगिरीने सर्वांचेच लक्ष वेधून घेतले आहे. सप्टेंबर महिन्यात ऑस्ट्रेलियात झालेल्या सीनियर वेटलिफ्टिंग चॅम्पियनशिप स्पर्धेत सुवर्णपदक मिळवून चानूने पुढच्यावर्षी होणा-या राष्ट्रकुल स्पर्धेतही आपले स्थान निश्चित केले.