कापूस आणि तुरीच्या पिकातील गांज्याच्या शेतीवर पोलिसांची धाड

पथकाने ८ लाख ६० हजार रुपये किंमतीचे १६९.५ किलो वजनाची गांज्याची झाडे जप्त केली.

ठळक मुद्दे१७० किलो वजनाची झाडे जप्त

गंगाखेड: तालुक्यातील डोंगरजवळा येथे शुकवारी (दि. ६ ) सायंकाळी स्थानिक गुन्हे शाखेच्या पथकाने धाड टाकून कापूस व तुरीच्या पिकातील गांज्याची शेती उद्धवस्त केली. यावेळी पथकाने ८ लाख ६० हजार रुपये किंमतीचा १६९.५ क्विंटल गांजा जप्त केला आहे.

गंगाखेड तालुक्यातील पिंपळदरी पोलीस ठाण्याच्या हद्दीत असलेल्या डोंगरजवळा येथील शेतीत कापूस व तुरीच्या पिकात गांजाची झाडे लावल्याची गोपनीय माहिती स्थानिक गुन्हे शाखेला मिळाली. यानंतर सपोनि व्यंकटेश्वर आलेवार, शरद विपट यांच्या पथकाने शुक्रवारी सायंकाळी ४:४५ वाजेपासून ते ५:३५ वाजे दरम्यान नाथराव देवराव मुंडे ( ७५ ) व दगडीराम देवराव मुंडे (८० ) यांच्या गट क्रमांक ६४, ६५ या शेतावर धाड टाकली. यावेळी कापूस व तुरीच्या पिकात गांजाची लागवड केल्याचे आढळून आले. पथकाने ८ लाख ६० हजार रुपये किंमतीचे १६९.५ किलो वजनाची गांज्याची झाडे जप्त केली. पोलिसांनी नाथराव देवराव मुंडे, दगडीराम देवराव मुंडे ( दोघे रा. डोंगरजवळा ता. गंगाखेड ) यांच्या विरुद्ध पिंपळदरी पोलीस ठाण्यात एनडीपीएस अक्ट १९८५ चे कलम २० (अ), (ब) (१), २२ अन्वये गुन्हा दाखल केला आहे. पुढील तपास सपोनि राजकुमार पुजारी करत आहेत.