शुक्राचा मंगळाच्या राशीत प्रवेश: ‘या’ ५ राशींना सुख-समृद्धी; राहुची होईल कृपा, लाभाचा काळ!

शुक्राचे या महिन्यात होत असलेले राशीपरिवर्तन अनेक राशींसाठी चांगल्या संधींचे ठरू शकेल, असे सांगितले जात आहे.

ज्योतिषशास्त्रानुसार, मार्च महिन्यात बुध, सूर्य आणि शुक्र असे महत्त्वाचे ग्रह राशीपरिवर्तन करत आहेत. विशेष म्हणजे या एका महिन्यात बुध दोनवेळा राशीपरिवर्तन करणार आहे. याशिवाय मार्च महिन्यात शुक्राचा मंगळाचे स्वामित्व असलेल्या मेष राशीत होत असलेला प्रवेश महत्त्वाचा मानला गेला आहे. मेष राशीत विराजमान असलेल्या राहुचा शुक्राशी युती योग जुळून येणार आहे.

रोमान्स, कलात्मक प्रतिभा, शारीरिक व भौतिक जीवनाची गुणवत्ता, धन, आनंद, ललित कला, संगीत, नृत्य, चित्रकला, मूर्तिकला यांचा कारक मानला गेलेला शुक्र ग्रह १२ मार्च रोजी गुरुचे स्वामित्व असलेल्या मीन राशीतून मेष राशीत प्रवेश करत आहे.

मेष राशीत राहु विराजमान असून, शुक्र आणि राहुची युती होणार आहे. एप्रिल महिन्यात शुक्र स्वराशीत म्हणजेच वृषभ राशीत प्रवेश करेल. शुक्राच्या मेष प्रवेशामुळे होळीनंतरचा काळ काही राशीच्या व्यक्तींसाठी अतिशय लाभदायक, शुभ असू शकेल. कोणत्या राशींना फायदा होऊ शकेल, ते जाणून घेऊया...

मेष राशीच्या व्यक्तींना शुक्राचा याच राशीत होत असलेला प्रवेश अनुकूल ठरू शकेल. तुमच्या व्यक्तिमत्त्वात सकारात्मक बदल दिसून येतील. या काळात कुटुंबीयांचे आणि मित्रांचा पूर्ण पाठिंबा मिळेल. लव्ह लाईफ खूप चांगली असणार आहे. विवाहितांना जोडीदाराचे पूर्ण सहकार्य मिळेल. प्रेमसंबंध वृद्धिंगत होऊ शकतील.

मिथुन राशीच्या व्यक्तींना शुक्राचा मेष प्रवेश खूप फायदेशीर ठरू शकेल. या काळात अनेक नवीन लोकांशी संपर्क स्थापित कराल. जे भविष्यात फायदेशीर ठरेल. या कालावधीत मुलांकडून काही चांगली बातमी मिळू शकते. विद्यार्थ्यांसाठीही शुक्राचे गोचर खूप चांगले ठरू शकेल.

सिंह राशीच्या व्यक्तींना शुक्राचा मेष प्रवेश लाभदायक ठरू शकेल. आगामी काळात नशिबाची उत्तम साथ लाभू शकेल. विवाहितांसाठी हा काळ उत्तम ठरू शकेल. कोणतेही नवीन काम सुरू करायचे असेल तर हा कालावधी चांगला ठरू शकेल. कामानिमित्त लांबच्या प्रवासाला जावे लागू शकते. नवीन नोकरीच्या शोधात असलेल्यांना चांगली संधी मिळू शकते.

धनु राशीच्या व्यक्तींना शुक्राचा मेष प्रवेश फायदेशीर ठरू शकेल. विशेषत: विद्यार्थ्यांसाठी हा काळ चांगला आहे. विवाहितांना शुभ वार्ता मिळू शकते. एखादा जुना वाद निकाली निघू शकतो. आर्थिक स्थिती खूप चांगली होऊ शकेल. अनेकविध मार्गांनी पैसे कमवण्याची संधी मिळू शकेल. नोकरदारांना पदोन्नती मिळण्याची शक्यता आहे.

मीन राशीच्या व्यक्तींना शुक्राचा मेष प्रवेश सकारात्मक ठरू शकेल. आगामी काळात तुम्ही पैसे वाचवू शकाल. जोडीदारासोबतचे संबंध चांगले राहू शकतील. सासरच्या मंडळींशी संबंध चांगले राहतील. लोक तुमच्याकडे आकर्षित होऊ शकतील.

मेष राशीत आताच्या घडीला विराजमान असलेला राहु ग्रह क्रूर आणि छाया ग्रह मानला जातो. मात्र, तरीही शुक्र आणि राहुची युती काही राशींना फायद्याची मानली जात आहे. - सदर माहिती सामान्य गृहीतके आणि ज्योतिषीय मान्यतांवर आधारित असून, यासंदर्भात तज्ज्ञ व्यक्तींचा सल्ला घेणे उपयुक्त ठरू शकेल, असे सांगितले जात आहे.