Anil Ambani News: अनिल अंबानींच्या रिलायन्स समुहाच्या शेअर्समध्ये जबरदस्त वाढ, मार्केट कॅप १००० टक्के वाढला

Anil Ambani Reliance Group : अनिल अंबानी यांच्या रिलायन्स समुहाच्या मार्केट कॅपमध्ये १ हजार टक्क्यांची वाढ. ३ महिन्यांपेक्षाही कमी कालावधीत झाली ही वाढ.

मोठ्या कर्जात अडकलेल्या अनिल अंबानी (Anil Ambani) यांच्या रिलायन्स समुहाच्या (Reliance Group) मार्केट कॅपमध्ये १ हजार टक्क्यांपेक्षाही अधिक वाढ झाली आहे. महत्त्वाची बाब म्हणजे ३ महिन्यांपेक्षा कमी कालावधीत ही मोठी वाढ झाली आहे.

मार्च महिन्यात अनिल अंबानी समुहाचं मार्केट कॅप ७३३ कोटी रूपये होतं. परंतु मे महिन्यात ते ३,८९० कोटी रूपयांवर गेलं आणि १८ जून रोजी ते ७,८६६ कोटी रूपयांवर पोहोचलं.

गेल्या २० दिवसांमध्ये समुहाच्या कंपन्या रिलायन्स इन्फ्रास्ट्रक्चर (Reliance Infrastructure), रिलायन्स पॉवर (Reliance Power) आणि रिलायन्स कॅपिटलचं (Reliance Capital) मार्केट कॅप दुपटीपेक्षा अधिक झालं आहे.

रिलायन्स पॉवरचं मार्केट कॅप ४,४४६ कोटी रूपये, रिलायन्स इन्फ्रास्ट्रक्चरचं मार्केट कॅप २,७६७ कोटी रूपये आणि रिलायन्स कॅपिटलचं मार्केट कॅप ६५३ कोटी रूपये आहे.

या तीन कंपन्यांमधून ५० लाखांपेक्षा अधिक किरकोळ गुंतवणूकदारांनाही फायदा झाा आहे. रिलायन्स समूहात मोठ्या प्रमाणात किरकोळ गुंतवणूकदार आहे.

रिलायन्स पॉवरमध्ये ३३ लाख, रिलायन्स इन्फ्रास्ट्रक्चरमध्ये ९ लाख आणि रिलायन्स कॅपिटलमध्ये ८ लाख किरकोळ गुंतवणूकदार आहेत.

गेल्या काही वर्षांदरम्यान एफआयआय आणि म्युच्युअल इंड रिलायन्स समुहाच्या कंपन्यांपासून दूर जाताना दिसत आहेत. तर दुसरीकडे बँकांनीदेखील तारण ठेवण्यात आलेल्या शेअर्सची बाजारात विक्री केली आहे.

याचीच खरेदी किरकोळ गुंतवणूकदारांनी केली आणि त्यानंतर कंपन्यांच्या शेअर्सच्या किंमतीत वाढ होत आहे. गेल्या काही दिवसांत कंपनीच्या बाबतीत घडलेल्या सकारात्मक बाबींचाही कंपनीच्या शेअर्सवर परिणाम झाला आहे.

रिलायन्स इन्फ्रास्ट्रक्चरने प्रमोटर ग्रुप आणि Varde Investment Partners, LLP ची सहयोगी कंपनी VSFI Holdings Pvt Ltd कडून ५५० कोटी रूपये जमवण्याची घोषणा केली आहे.

रिलायन्स पॉवरच्या बोर्डानं आपली प्रमोटर कंपनी रिलायन्स इन्फ्रास्ट्रक्चरला एकूण १,३२५ कोटी रूपयांच्या ५९.५ कोटी प्रेफरन्शिअल शेअर आणि ७३ कोटी वॉरंट जारी करण्याच्या प्रस्तावाला मंजुरी दिली आहे.

यानंतर रिलायन्स पॉवरवर असलेल्या कर्जात १,३२५ कोटी रूपयांची घट होईल. तसंच रिलायन्स कॅपिटल समुहाची कंपनी रिलायन्स होम फायनॅन्स आपल्या विक्रीच्या अखेरच्या टप्प्यात आहे.

यामुळे रिलायन्स कॅपिटलवरील कर्जही ११ हजार कोटी रूपयांपेक्षा अधिक कमी होणार आहे.