Health Tips: मासिक पाळीच्या काळात कमी रक्तस्राव होण्यामागील कारणं जाणून घ्या!

Women Health : मासिक पाळी हा प्रत्येक स्त्रीच्या जीवनाचा अविभाज्य भाग असतो. प्रत्येक स्त्रीला या प्रक्रियेतून जावे लागते. या काळात महिलांना रक्तस्राव, पोटदुखी आणि मूड स्विंगचा सामना करावा लागतो. नियमीत येणारे पीरियड्स हे प्रत्येक स्त्रीचे चांगले आरोग्य दर्शवतात. त्यात थोडीही गडबड झाली, तरी त्याचा आरोग्यावर परिणाम होतो. काही स्त्रियांना पाळी नियमीत वेळेत येते पण रक्तस्राव खूप कमी होतो. जर तुमच्यासोबतही असे घडत असेल तर, मासिक पाळी दरम्यान रक्त प्रवाह कमी होण्यामागील कारणाबद्दल आरोग्य तज्ञ प्रियांका जयस्वाल यांच्याकडून जाणून घेऊया.

अतिविचारामुळे बायका तणाव ओढवून घेतात. तणावामुळे रक्तस्त्राव कमी होऊ शकतो. खरं तर, तणावामुळे शरीरात कोर्टिसोल हार्मोन वाढतो, ज्यामुळे हायपोथालेमस, पिट्यूटरी आणि स्वादुपिंडाच्या कार्यावर परिणाम होतो, ज्यामुळे रक्तस्त्राव कमी होऊ शकतो.

तरुण वयात मासिक पाळी आल्यानेही रक्तप्रवाह कमी होतो. या वयात हार्मोन्स कमी तयार होतात ज्यामुळे रक्तस्त्राव कमी होतो. कधीकधी मुलींना खूप कमी रक्तस्त्राव होतो किंवा जेमतेम डाग दिसतात.

PCOD आणि PCOS च्या समस्येमध्ये देखील हार्मोनल असंतुलनामुळे, मासिक पाळी दरम्यान रक्त प्रवाह कमी होतो. या स्थितीत, हार्मोन्स कमी तयार होतात ज्यामुळे रक्त प्रवाह कमी होतो.

तुमचे वय जास्त असल्यास आणि रजोनिवृत्तीपूर्वीच्या टप्प्यात असल्यास, तुमचा रक्तप्रवाह देखील कमी होऊ शकतो. याशिवाय तुमचे वजन कमी असेल आणि शरीरात चरबी कमी असेल तर मासिक पाळी देखील अनियमित होऊ शकते. अशा परिस्थितीत तुमचे हार्मोन्स सामान्यपणे कार्य करू शकत नाहीत.

तज्ज्ञांच्या मते, ज्या स्त्रिया खूप तीव्र वर्कआउट करतात त्या आवश्यकतेपेक्षा जास्त ऊर्जा वापरतात त्यांनाही मासिक पाळीच्या काळात कमी रक्तस्राव होण्याचा प्रश्न भेडसावू शकतो.

जेव्हा थायरॉईड संप्रेरकांचे उत्पादन झपाट्याने वाढते तेव्हादेखील मासिक पाळीवर त्याचे परिणाम होतात आणि फ्लो कमी होतो.