मेंदी काढण्यावरून एकास मारहाण

मेंदी काढण्याच्या कारणावरून तरुणाला मारहाण करण्यात आली. ही घटना चिंचवड येथे मंगळवारी रात्री दहाच्या सुमारास घडली. जितेंद्र नायक (वय २२, रा. साईरामनगर, चिंचवडेनगर) यांनी याप्रकरणी चिंचवड पोलीस ठाण्यात फिर्याद दिली आहे.

पिंपरी : मेंदी काढण्याच्या कारणावरून तरुणाला मारहाण करण्यात आली. ही घटना चिंचवड येथे मंगळवारी रात्री दहाच्या सुमारास घडली. जितेंद्र नायक (वय २२, रा. साईरामनगर, चिंचवडेनगर) यांनी याप्रकरणी चिंचवड पोलीस ठाण्यात फिर्याद दिली आहे. त्यानुसार गणेश शेळके (वय ३५, रा. गांधी पेठ, चिंचवड) या आरोपीसह अन्य चार साथीदारांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, गणेश याचे गांधी पेठेत ब्युटी प्रॉडक्टचे दुकान आहे. जितेंद्र मेहंदी काढण्याचे काम करतो. गणेशच्या दुकानाबाहेर जितेंद्र मेहंदी काढण्यासाठी बसतो. नेहमीप्रमाणे जितेंद्र गणेश याच्या ब्यूटी प्रॉडक्टच्या दुकानासमोर बसला होता.
मेहंदी काढण्यावरून त्यांच्यात वाद झाला. गणेश याने साथीदारांना बोलावून घेऊन फिर्यादीला मारहाण केली. यामध्ये फिर्यादी गंभीर जखमी झाला आहे. चिंचवड पोलीस अधिक तपास करीत आहेत. शहर परिसरामध्ये मारामारीच्या घटना वाढल्याने चिंता व्यक्त होत आहे.