सोशल मीडियावरील ओळखीतून राष्ट्रीय महिला खेळाडूवर अत्याचार

आर्थिक फसवणूकीसोबत आरोपीने अत्याचार केले...

पुणे : सोशल मीडियावर टिंडर डेटिंग ॲपद्वारे झालेल्या ओळखीतून एका राष्ट्रीय महिला खेळाडूची आर्थिक फसवणूक करून तिच्यावर अत्याचार केल्याचा धक्कादायक प्रकार नुकताच उघडकीस आला आहे. यासंदर्भात डेक्कन पोलीस ठाण्यात गुन्हा नाेंदविण्यात आला आहे.

पीडित तरुणी ही राष्ट्रीय खेळाडू असून, तिने टिंडर डेटिंग ॲपवर एका प्रौढ व्यक्तीची रिक्वेस्ट स्वीकारली. त्यातून त्यांच्यात मैत्री झाली. त्यानंतर वेगवेगळी आमिषे दाखवून त्याने तिच्यावर अत्याचार केले. पीडित तरुणी स्पर्धा परीक्षांची तयारीदेखील करीत आहे. तिने तिच्या मोबाईलमध्ये टिंडर डेटिंग ॲप डाऊनलोड केले होते.

हे ॲप डाऊनलोड केल्यानंतर तिने एक रिक्वेस्ट स्वीकारली. त्यानंतर दोघांमध्ये चॅटिंग सुरू झाली. त्यानंतर भेटीगाठी होऊ लागल्या. पीडित तरुणीला त्या व्यक्तीने वेगवेगळी आमिष दाखवून तिच्याशी मुंबई आणि अन्य ठिकाणी नेऊन जबरदस्तीने संबंध ठेवले.

या व्यक्तीचे यापूर्वीच लग्न झाले असून, तो फसवणूक करीत असल्याचे लक्षात आल्यावर तिने पोलिसांकडे फिर्याद नोंदवली. डेक्कन पोलीस या प्रकरणी तपास करीत आहेत.