कारचालकाची मुजोरी, वाहतूक पोलिसाला नेले फरफटत; खडकीतील घटना

खडकीतील रेल्वे भुयारी मार्गातून भरधाव जाणाऱ्या मुजोर कारचालकाला थांबविण्याचा प्रयत्न करणाऱ्या वाहतूक पोलिसाला फरफटत नेण्याचा प्रकार

पुणे :

खडकीतील रेल्वे भुयारी मार्गातून भरधाव जाणाऱ्या मुजोर कारचालकाला थांबविण्याचा प्रयत्न करणाऱ्या वाहतूक पोलिसाला फरफटत नेण्याचा प्रकार समोर आला आहे. या घटनेत वाहतूक पोलीस जखमी झाला असून खडकी पोलिसांनी कारचालक तरुणाला अटक केली आहे.

याबाबत वाहतूक पोलीस कर्मचारी गणेश शिवाजी राबाडे (वय ३३) यांनी खडकी पोलीस ठाण्यात फिर्याद दिली आहे. राबाडे यांच्या दोन्ही पायांना दुखापत झाली आहे. या प्रकरणी कारचालक सूरज भारत जाधव (वय २९, रा. मामुर्डी, देहूरोड) याला अटक करण्यात आली आहे. सूरज याच्याविरुद्ध शासकीय कामात अडथळा आणणे, दुखापत करणे या कलमांन्वये गुन्हा दाखल करण्यात आला आहे. ही घटना खडकी पोलीस ठाण्याच्या समोरील चर्च चौकात शुक्रवारी दुपारी पाऊण वाजता घडली.

पोलीस शिपाई गणेश राबाडे खडकी वाहतूक विभागात नियुक्तीस आहेत. राबाडे आणि त्यांचे सहकारी विजय आढारी खडकीतील रेल्वे भुयारी मार्ग परिसरात वाहतूक नियमन करत होते. खडकीतील मेट्रोच्या कामामुळे या भागात वाहतूक बदल करण्यात आले आहेत. कारचालक सूरज जाधव वेगाने लेन कट करुन निघाला होता. पोलीस कर्मचारी राबाडे आणि आढारी यांनी त्याला थांबविण्याचा प्रयत्न केला. तेव्हा जाधवने कार दोघांच्या अंगावर घातली. प्रसंगावधान राखून राबाडे कारच्या बोनेटवर चढले. त्यानंतरही जाधवने कार तशीच पुढे नेली. पोलीस कर्मचारी राबाडे यांना काही अंतर फरफटत नेले. राबाडे यांनी आरडाओरडा केला. तेव्हा तेथून निघालेल्या नागरिकांनी हा प्रकार पाहिला. नागरिकांनी जाधव याला अडवले. कारचा अचानक ब्रेक दाबल्याने राबाडे बोनेटवरुन खाली पडले. त्यांच्या दोन्ही पायांना दुखापत झाली.

कारचालक जाधवला अटक करण्यात आली असून पोलीस उपनिरीक्षक शामल पाटील तपास करत आहेत.