शेतामध्ये विषारी रसायनाचा टँकर ओतल्याची तक्रार

जेजुरी-मोरगाव रस्त्याकडेला असलेल्या नाझरे हद्दीतील शेतातील ओढ्यांत मध्यरात्रीच्या सुमारास अज्ञात टँकरचालकाने विषारी रसायन

जेजुरी : जेजुरी-मोरगाव रस्त्याकडेला असलेल्या नाझरे हद्दीतील शेतातील ओढ्यांत मध्यरात्रीच्या सुमारास अज्ञात टँकरचालकाने विषारी रसायन ओतून दिल्याने या परिसरातील जमीन नापीक झाली असून रसायनाच्या तीव्रतेमुळे झाडे जळाली आहेत. उग्र वास असणारे हे रसायन नक्की कोणत्या कंपनीचे आहे, हे समजले नाही. या परिसरातील दोन ओढ्यांमध्ये रात्रीच्या वेळी टँकर ओतले जात असल्याने शेतकऱ्यांमध्ये चिंता आहे.
याबाबत येथील शेतकरी प्रकाश लक्ष्मण खाडे, अरुण सदाशिव खाडे यांनी जेजुरी पोलीस ठाण्यात रीतसर तक्रार दाखल केली आहे. गेल्या पंधरा दिवसांमध्ये दोन वेळा या ठिकाणी टँकर ओतल्याची तक्रार आहे. या ओढ्याच्या परिसरात पाण्याच्या विहिरी असल्याने विहिरीतील पाणी दूषित होऊ लागले आहे.(वार्ताहर)