बाप रे ! मुंबई- बंगळुरु महामार्गावर एकापाठोपाठ ६ अपघात; भूमकर पुलावरुन ट्रक खाली कोसळला

या अपघातांमुळे संपूर्ण महामार्गावर वाहतूक कोंडी झाली आहे...

पुणे : मुंबई- बेंगळरू महामार्गावर पहाटेपासून अपघाताची मालिका सुरु असून आतापर्यंत वेगवेगळ्या ठिकाणी ६ अपघात घडले आहेत. या अपघातात २ जणांचा मृत्यु झाला असून अनेक जण जखमी झाले आहेत. कात्रजवरुन आलेला एक ट्रक  भूमकर पुलावरुन खाली कोसळला आहे. या अपघातांमुळे संपूर्ण महामार्गावर वाहतूक कोंडी झाली आहे. पुढे ट्रॉफिक जाम झाले असल्याचे दिसत असतानाही दोन ट्रक पुढे थांबलेल्या वाहनांवर जाऊन धडकले आहेत. 

सोमवारी पहाटे या महामार्गावर भरधाव आलेल्या ट्रकने पुढील ट्रकला धडक दिल्याने भीषण अपघात झाला. त्यात ट्रकमधील दोघांचा जागीच मृत्यु झाला तर एक जण जखमी झाला होता. तर दोन ट्रक समोरासमोर एकमेकांना धडकून पलटले होते. या अपघातामुळे महामार्गावर मोठी वाहतूक कोंडी झाली आहे. असे असतानाच कात्रजवरुन आलेल्या एका ट्रकचे नियंत्रण सुटल्याने तो भूमकर पुलावरुन खाली सर्व्हिस रोडवर कोसळला. त्यापाठोपाठ दोन ट्रकच्या मधून एक रिक्षा जात होती. त्यात मागील ट्रकने रिक्षाला धडक दिल्याने रिक्षा पुढील ट्रकला धडकली. त्यात दोन्ही ट्रकमध्ये रिक्षा अडकून पडली. त्यात रिक्षाचालक व प्रवासी महिला जखमी झाले. सुदैवाने महिलेचे २ महिन्यांचे बाळ सुखरुप बचावले आहे. 

अपघातामुळे वाहतूक कोंडी झाली असतानाच वेगाने आलेल्या ट्रकने पुढील वाहनांना धडक देण्याच्या आणखी दोन घटना या महामार्गावर घडल्या. त्यात ग्रामीण पोलीस दलाची व्हॅन व एका कारचे नुकसान झाले आहे.

वाहतूक शाखेचे कर्मचारी व सिंहगड रोड पोलीस ठाण्याचे वरिष्ठ पोलीस निरीक्षक देवीदास घेवारे यांच्यासह पोलीस अधिकारी व कर्मचारी अपघातग्रस्त वाहने बाजूला काढून रस्त्यावरील वाहतूक सुरळीत करण्याचा प्रयत्न करीत आहेत.