Pune | दत्तनगर-जांभुळवाडी रोडवर ट्रकखाली येऊन दुचाकी चालकाचा मृत्यू

जांभूळवाडी कडून दत्तनगर चौक मार्गे आंबेगावकडे जात असताना त्याची दुचाकी घसरली....

कात्रज (पुणे) : दत्तनगर-जांभुळवाडी रोडवर मंगळवारी दुपारी दीड वाजनेच्या दरम्यान रेडिमिक्स ट्रकच्या खाली येऊन एका दुचाकी चालकाचा मृत्यू झाल्याची घटना घडली. मकरंद गोपाळ जिंदे (वय ३४, रा. आंबेगाव बु.) असे या अपघातात मृत्यमुखी पडलेल्या इसमाचे नाव आहे.

सदरील व्यक्ती जांभूळवाडी कडून दत्तनगर चौक मार्गे आंबेगावकडे जात असताना त्याची दुचाकी घसरली. यामध्ये पाठीमागून येणाऱ्या रेडिमिक्स ट्रकच्या पाठीमागील चाकाखाली आल्याने मकरंद जिंदे यांचा जागेवरच मृत्यू झाला. सदरील घटनेची माहिती भारती विद्यापीठ पोलिस स्टेशनला मिळताच घटनास्थळी पोलिस पोहोचले.मृतदेह शवाविच्छेदनासाठी ससून रुग्णालयात पाठवण्यात आला असून रेडिमिक्स चालकास पुढील चौकशीसाठी पोलिसांनी ताब्यात घेतले आहे.

मागील वर्षभरात अशा पद्धतीने अनेक अपघात झाले असून, त्यामुळे अनेक निष्पाप लोकांचा बळी गेला आहे. दत्तनगर शनिनगर रोडवर अवजड वाहतुकीस बंदी असून दुपारी बारा ते चारच्या दरम्यान वाहतुकीस मुभा आहे. तसेच अरुंद रस्ते आणी निकामी पदपथ यामुळे वाहन चालवताना कसरत करावी लागते आहे.