खेड तालुक्यातील पाच ग्रामपंचायतींसाठी १८ सप्टेंबरला मतदान

१९ तारखेला होणार मतमोजणी...

राजगुरुनगर : खेड तालुक्यातील पाच ग्रामपंचायतींचा पंचवार्षिक निवडणूक कार्यक्रम जाहीर झाला आहे. आज (बुधवार) पासून उमेदवारी अर्ज दाखल करण्यास सुरुवात झाली आहे. तसेच रविवार (दि. १८) रोजी मतदान तर सोमवार (दि. १९) रोजी राजगुरुनगर येथे मतमोजणी होणार असल्याची माहिती तहसीलदार डॉ. वैशाली वाघमारे यांनी दिली.

खेड तालुक्यातील खरपूड, रोहकल, चिखलगाव, दरकवाडी आणि कोयाळी तर्फे वाडा अशा पाच ग्रामपंचायतींच्या पंचवार्षिक निवडणुकीचा कार्यक्रम निवडणूक आयोगाने जाहीर केला आहे. या ग्रामपंचायतींच्या निवडणुकीत २७, २८ आणि ३१ ऑगस्ट हे तीन दिवस सार्वजनिक सुट्टी वगळता उमेदवारी अर्ज आजपासून दि. १ सप्टेंबरपर्यंत सकाळी ११ ते दुपारी ३ या वेळेत राजगुरुनगर येथे दाखल करता येणार आहे.

नामनिर्देशन पत्राची छाननी २ सप्टेंबर रोजी सकाळी ११ वाजल्यापासून सुरू करण्यात येणार आहे. उमेदवारी अर्ज माघारी घेण्यासाठी दि. ६ सप्टेंबरपर्यंत दुपारी ३ वाजेपर्यंत मुदत आहे. त्यानंतर चिन्ह वाटप केले जाणार असून मतदान रविवारी सकाळी ७.३० ते सायंकाळी ५.३० यावेळेत संबंधित गावाच्या मतदान केंद्रावर होणार आहे.