फूट दिसतेय, मात्र अजून स्पष्ट नाही; घटनातज्ज्ञ प्रा. उल्हास बापट यांचं मत

९ जणांनी मंत्री म्हणून शपथ घेतली असली तरी अन्य आमदारांच्या भूमिका अद्याप स्पष्ट झालेल्या नाहीत.

पुणे : आजच्या राजकीय घडामोडींना घटनात्मक किंवा कायदेशीर दृष्टिकोनातून पाहण्यासाठी थोडावेळ जाऊ द्यावा लागेल, पण यामध्ये तत्त्व नावाचा प्रकार औषधालाही शिल्लक नाही, हे मात्र खरे, अशी प्रतिक्रिया प्रसिद्ध घटनातज्ज्ञ प्रा. उल्हास बापट यांनी दिली.  ठाकरे यांच्या नेतृत्वाखालील शिवसेनेत पडली तशीच फूट आता राष्ट्रवादीमध्ये पडलेली दिसते आहे. मात्र, ही फूट अजून स्पष्ट व्हायची आहे.

९ जणांनी मंत्री म्हणून शपथ घेतली असली तरी अन्य आमदारांच्या भूमिका अद्याप स्पष्ट झालेल्या नाहीत. त्यातच राष्ट्रवादीचे अध्यक्ष शरद पवार यांनी ‘माझ्याबरोबर काही आमदारांनी संपर्क केला असून, त्यांनी आपली भूमिका वेगळी आहे असे सांगितले आहे’, असे जाहीर केले आहे. त्यामुळे घटनेच्या व कायद्याच्या कसोटीवर विचार करण्याआधी थोडा वेळ जाऊ द्यावा लागेल, असेही प्रा. बापट म्हणाले. 

लाेकांचा निर्णय अंतिम 
पवार यांनी ‘लोकांमध्ये जाणार’ असे म्हटले आहे, ते बरोबर आहे; कारण लोकशाहीत लोकांनी घेतलेला निर्णयच अंतिम असतो, असेही प्रा. बापट म्हणाले.