व्हिडीओसाठी उंचावरून उडी मारणं जीवावर बेतलं; खडकवासला धरणात तरुणाचा करुण अंत

पंप हाऊसच्या कठड्यावरून उडी मारल्यानंतर तरुण बुडाला

शिवणे: खडकवासला धरणातील पंप हाऊसजवळ पोहत असताना एका तरुणाचा पाण्यात बुडून मृत्यू झाल्याची घटना शनिवारी संध्याकाळी घडली आहे. उंचावर जाऊन पाण्यात उडी मारण्याचा व्हिडिओ बनवत असताना ही घटना घडली. आशिष सुभाष फुरंगे (वय १८. रा. कर्वेनगर) असे दुर्घटनेत मृत्यू झालेल्या तरुणाचे नाव आहे.

आशिष फुरंगे सायंकाळी आपल्या इतर दोन मित्रांसोबत खडकवासला धरणात पोहण्यासाठी आला होता. पाण्यात उडी मारतानाचा व्हिडिओ काढण्यासाठी आशिष खडकवासला गावच्या पंप हाऊसच्या कठड्यावर चढला आणि त्याचा मित्र व्हिडिओ काढत होता. आशिषने पाण्यात उडी मारली परंतु तो वर आला नाही. मित्रांनी आरडाओरडा करून लोकांना मदतीसाठी बोलावले. परंतु कोणीही काही करू शकले नाही.

सदर घटनेची माहिती मिळताच बंदोबस्तासाठी तैनात असलेले वाहतूक पोलीस विलास बांबळे,प्रवीण ताकवले , तातडीने घटनास्थळी पोहोचले. पोलिसांनी आशिषचा शोध घेण्यासाठी पीएमआरडीएच्या नांदेड सिटी अग्निशमन दलाला पाचारण केले. अग्निशमन केंद्र प्रमुख सुजित पाटील यांच्या मार्गदर्शनाखाली वाहनचालक सोन्याबापू नागरे, अग्निशमन विमोचन किशोर काळभोर, अक्षय काळे, पंकज माळी, योगेश मायनाळे, शरद माने या जवानांनी आशिष चा मृतदेह शोधून काढला. पाण्यात उडी मारताना  पाण्यात डोक्याला मार लागून गंभीर दुखापत होऊन आशिष चा मृत्यू झाला असल्याची शक्यता उपस्थित पोलिसांनी व्यक्त केली आहे. मृतदेह उत्तरीय तपासणीसाठी ससून रुग्णालयात पाठविण्यात आला असून पुढील कार्यवाही सुरू आहे.