कठड्यावर दुचाकी आदळून एकजण ठार

राजापूर : महामार्गावर कठड्याचा अंदाज न आल्याने त्यावर दुचाकी आदळून एकजण जागीच ठार झाल्याची घटना बुधवारी रात्री ओणी पेट्रोलपंपासमोर घडली. राकेश तुकाराम गुरव (वय ३२, रा. चुनाकोळवण, गुरववाडी) असे मृत्यू झालेल्या तरुणाचे नाव आहे. दुचाकीस्वार समीर शंकर बाईत हा गंभीर जखमी असून, त्याला रत्नागिरीच्या जिल्हा शासकीय रुग्णालयात उपचारासाठी दाखल करण्यात आले आहे.

बुधवारी रात्री मुंबई-गोवा महामार्गावरील ओणी येथील पेट्रोलपंपाकडून राकेश तुकाराम गुरव आणि समीर शंकर बाईत हे दुचाकीवरुन चुनाकोळवणकडे चालले होते. ओणी येथील पेट्रोलपंपासमोर असलेल्या कठड्याजवळ त्यांची दुचाकी आली आणि अचानक त्या कठड्यावर गाडी आदळून अपघात घडला. त्यावेळी समीर शंकर बाईत हा दुचाकी चालवित होता, तर राकेश तुकाराम गुरव मागील सीटवर बसले होते. त्या झालेल्या अपघातात दोघे दुचाकीस्वार जबरदस्त मार लागून जखमी झाले. त्यामध्ये राकेशला डोक्याला मोठा मार बसल्याने तो जागीच गतप्राण झाला; तर दुचाकीचालक समीर हा जबर जखमी झाला आहे. या अपघाताची माहिती तुकाराम बापू गुरव यांनी राजापूर पोलीस स्थानकात दिली. याप्रकरणी पोलीस हेडकॉन्स्टेबल सुरेंद्र जाधव अधिक तपास करीत आहेत.