मराठवाड्याची राजधानी असणारं औरंगाबाद (Aurangabadi Food) हे शहर पर्यटनाच्या बाबतीतही अतिशय समृद्ध आहे. त्यामुळेच तर शहराच्या जवळ असणारी वेरुळ लेणी, दौलताबाद, खुलताबाद, बिवी- का- मकबरा, पाणचक्की, अजिंठा लेणी (Ajanta and Ellora Caves) अशी काही ठिकाणं पाहण्यासाठी या शहरात भारतीय तसेच परदेशी पर्यटकांची वर्षभर वर्दळ असते. आता या शहरात आल्यावर स्थानिक औरंगाबादकरांप्रमाणेच पर्यटकांची पावलंही समोसा राईस (Samosa Rice) या भन्नाट पदार्थाची चव चाखायला सिडको भागातील त्रिमुर्ती आप्पा नाश्ता सेंटरकडे वळतात. औरंगाबादमध्ये आल्यावर खवय्यांनी जे काही पदार्थ हमखास चाखून बघायला पाहिजेत (Famous street food in Aurangabad ), त्या पदार्थांमध्ये आता समोसा राईसचं नाव आवर्जून घेतलं जातं.
साधारण २० वर्षांपुर्वी दादासाहेब घोडे, अजिनाथ घोडे आणि आप्पासाहेब घोडे या भावंडांनी सिडकोमध्ये छोटीशी टपरी सुरू केली होती. ग्राहकांच्या मागणीवरूनच या भावंडांना एक भन्नाट आयडिया सुचली आणि त्यातूनच समोसा, भात आणि तर्री असं भन्नाट कॉम्बिनेशन असणाऱ्या समाेसा राईसचा जन्म झाला. २५ ते ३० रुपयांना मिळणारा एक प्लेट समोसा राईस घेतला तर अगदी भरपेट नाश्ता होतो हे नक्की. शिवाय चव एकदम भारी. त्यामुळे अप्पांकडे खवय्यांची कायम गर्दी असते. कॉलेजचे मुलं जसे इथे येतात, तसेच अगदी कुटूंबच्या कुटूंब येऊनही समोसा राईसचा आस्वाद घेतं.. रविवारी तर पार्सल नेणाऱ्यांची संख्या विशेष वाढलेली असते.
कसा असतो समोसा राईस?- या पदार्थासाठी जो भात केला जातो तो फोडणी देऊन मसालेदार केला जातो.- शिवाय तर्री लसूण, आलं, कांदा, टोमॅटो घालून तयार केली जाते. लालसर दिसणारी ही तर्री अतिशय खमंग आणि मराठवाड्यातला अस्सल झणझणीतपणा जपणारी आहे.
देसी गर्लचे 'देसी मॉम' स्टाइल प्रेम, प्रियांकाच्या बाळाच्या पायात काळे मणी, नेटिझन्स म्हणाले....- हा राईस सर्व्ह करताना सुरुवातीला मसालेभात एका मोठ्या बाऊलमध्ये वाढला जातो. त्यावर चांगली वाटीभर तर्री टाकली जाते. त्यावर समोस्याचे तुकडे करून टाकले जातात. वरतून कांदा- कोथिंबीर यांची मस्त पेरणी आणि त्यावर पिळलेली लिंबाची फोड.- अशी मस्त सजवलेली डिश जेव्हा आपल्यासमोर येते, तेव्हा ती व्यवस्थित कालवून घ्यायची आणि मग समोसाराईसचा आस्वाद घ्यायचा. तर्रीची एक वाटी सोबत ठेवलेली असतेच. गरज पडेल तेव्हा आणखी तर्री ओतून घ्यायची आणि या चटकदार पदार्थाचा आस्वाद घ्यायचा..