साखरेच्या पाकाने ओतपोत भरलेल्या, खमंग कुरकुरीत, थोड्याशा मऊसर अशा गरमागरम जिलेबी म्हणजे खवय्यांचा विकपॉईंट.. पाकातही ही जिलेबी वाटीतून जिभेवर येईपर्यंतही अनेक खवय्यांना धीर धरवत नाही.. पिवळसर, नारंगी रंगाची जिलेबी आपण नेहमीच खातो... पण आता जर जिलेबीचे खरे फॅन असाल तर सरळ दिल्ली गाठा आणि तिथली प्रसिद्ध काळी जिलेबी (black jalebi for foodies) एकदा चाखूनच बघा.. या जिलेबीचा खमंग, गोडसर कुरकुरीतपणा खाणाऱ्याला तिच्या प्रेमात पाडल्याशिवाय राहत नाही....
सध्या सोशल मिडियावर याच काळ्या जिलेबीचा एक व्हिडिओ सध्या चांगलाच व्हायरल झाला आहे.. सुरुवातीला ही जिलेबी जास्त तळल्या गेल्याने जळाली की काय, असं वाटतं... पण तसं मुळीच नाही. आपण नेहमी जी जिलेबी खातो ती मैद्यापासून तयार केली जाते. ही काळी जिलेबी मात्र खवा आणि बटाटा यांच्यापासून तयार झालेल्या पीठाने केली जाते. या जिलेबीला दिल्लीमध्ये मावा जिलेबी किंवा खवा जिलेबी असंही म्हणतात.
जुन्या दिल्लीतील हलवाईची दुकाने आणि प्रसिद्ध जामा मशिदीचा मागचा भाग याठिकाणी ही खास जिलेबी बनवली जाते. मध्यप्रदेशात एक- दोन ठिकाणीही खास काळी जिलेबी बनवली जाते. ही जिलेबी नेमकी कशी केली जाते, याचाच एक व्हिडिओ paidaishi_foodie's इन्स्टाग्राम पेजवर शेअर (instagram share) करण्यात आला आहे. खवा असल्याने या जिलेबीची चव गुलाबजामसारखी लागते, असंही काही खवय्यांनी सांगितलं आहे. रेसिपी आवडली असेल तर दिल्लीला गेल्यावर ही काळी मावा जिलेबी खायला विसरू नका.