प्रँक म्हणजे आपण एखाद्याची खिल्ली उडवतो किंवा त्याला थोडे सतवतो ती गोष्ट. कधी मित्रमंडळींसोबत तर कधी बहिण भावंडांसोबत आपण काही ना काही प्रँक करत असतो. आपल्या प्रत्येकाच्या आयुष्यात आधीच काही ना काही टेन्शन, ताण असतातच. पण आहे त्यातच थोडी मजा केली तर आपल्याला काही क्षणासाठी का होईना आपल्या चेहऱ्यावर हसू उमटते आणि आपण आनंदी राहतो. इंटरनेटच्या माध्यमातून सोशल मीडिय़ावर आपल्याला जगाच्या कोणत्याही कोपऱ्यात बसून कोणत्याही ठिकाणी घडणारी एखादी गोष्ट अगदी सहज पाहता येते. नुकताच असाच एक प्रँकचा व्हिडिओ सोशल मीडियावर व्हायरल झाला असून त्यामध्ये हत्ती एका महिलेशी प्रँक करताना दिसत आहे (Elephant Prank Viral Video).
आपण नेहमी कुत्रा, मांजर कधी माकड किंवा पोपट यांसारख्या प्राण्यांचे काही करामती किंवा प्रँक करतानाचे व्हिडिओ पाहतो. पण हत्ती एखाद्या व्यक्तीशी प्रँक करताना आपण क्वचितच पाहिले असेल. हत्ती अतिशय शांत आणि प्रेमळ प्राणी म्हणून ओळखला जातो. त्यांना कोणी त्रास दिला नाही तर तेही माणसांशी खूप प्रेमाने वागतात. हत्ती हा बुद्धिमान आणि समजूतदार प्राणी म्हणूनही ओळखला जातो. त्यामुळे तो कोणाची अशी चेष्टा करेल असे आपल्याला वाटणार नाही. पण व्हिडिओमध्ये दिसणाऱ्या हत्तीने महिलेची कशी खिल्ली उडवली हे पाहून आपल्यालाही आश्चर्य वाटल्याशिवाय राहणार नाही. आता हत्तीने खिल्ली उडवली म्हणजे नेमके काय केले ते पाहूया.
तर हत्तीशेजारी उभे राहून एक महिला फोटो काढत होती. ऊन असल्याने या महिलेने डोक्यावर हॅट घातली होती. हत्तीने आपल्या सोंडेने तिच्या डोक्यावरची हॅट अतिशय हळूवारपणे काढली. आता हा हत्ती या हॅटचे नेमके काय करणार असा प्रश्न पाहणाऱ्या सगळ्यांनाच पडतो. तर एकतर तो हॅट टाकून देणार किंवा चावून खाणार असे आपल्याला वाटते. त्याने सोंड आत घेतल्यावर ती हॅट खाल्ली असावी असा आपला समज होतो. सुरुवातीला ही महिलाही हत्तीने केलेल्या कृत्यामुळे हसते. पण काही वेळातच माझ्या बहिणीने नुकतीच मला ही हॅट दिली असून ती मला परत मिळेल का असे या महिलेने समोरच्या व्यक्तीला विचारले. कदाचित हा या हत्तींचा माहूत असावा. त्यानंतर हत्ती स्वत:हून हॅट महिलेच्या हातात देतो. इन्स्टाग्रामवर 'द ट्विस्टेड थॉटस' या पेजवर हा व्हिडिओ शेअर करण्यात आला असून हा 'माझा आतापर्यंतचा सर्वात आवडीचा व्हिडिओ आहे' असे अॅडमिनने व्हिडिओच्या कॅप्शनमध्ये लिहीले आहे.