बॉलीवूडचा सुपरस्टार शाहरुख खान (bollywood star Shah Rukh Khan) म्हणजे एक असं व्यक्तिमत्त्व की ज्याची नुसती एक झलक पाहण्यासाठी त्याचे लाखो- करोडो चाहते धडपडत असतात. व्हिडिओमध्ये दिसणारी ती महिलाही त्याची एक चाहतीच आहे. तिलाही शाहरुखला भेटण्याची इच्छा होतीच. पण तो अशा पद्धतीने भेटेल आणि तिचं स्वप्न साकार होईल, याची मात्र तिने कधी कल्पनाही केली नसेल. या महिलेचा आणि शाहरुख खानच्या भेटीचा व्हिडिओ सध्या सोशल मिडियावर व्हायरल झाला आहे.
काही दिवसांपुर्वी शाहरुख खानने 'सा रे ग म प लिटिल चॅम्प्स' या कार्यक्रमाच्या सेटवर हजेरी लावली होती. या सेटवर एक दिव्यांग महिला तिच्या पालकांसोबत आलेली होती. व्हिडिओमध्ये असं दिसत आहे की शाहरुख प्रेक्षकांमध्ये बसलेल्या त्या महिलेच्या व्हिलचेअर जवळ गेला आणि तिथे जमिनीवर बसून तिच्यासोबत छैय्या.. छैय्या... या लोकप्रिय गाण्यावर डान्स केला. क्षणभर त्या महिलेलाही काय होत आहे, हे नेमकं कळालं नाही. पण जेव्हा चक्क शाहरुख खान आपल्या सोबत नृत्य करतोय, याची जाणीव झाली, तेव्हा तिच्या आनंदाला पारावार उरला नाही.
त्या महिलेसकट तिच्यासोबत आलेले तिचे नातलग, कार्यक्रमाचे परिक्षक आणि उपस्थित सगळेच जण तो प्रसंग पाहून अतिशय भावनिक झाले होते. त्या महिलेला तर अत्यानंद झाल्याने कसं व्यक्त व्हावं, हेच समजत नसल्याचं तिच्या चेहऱ्यावरून स्पष्ट दिसत होतं. नृत्य झाल्यावर शाहरुखने अतिशय प्रेमाने तिला अलिंगन दिलं आणि त्यानंतर तिचा आणि तिच्या पालकांचा निरोप घेतला. शाहरुखने जे काही केलं, त्यानंतर त्याचं खूपच कौतूक सोशल मिडियामध्ये होत आहे. "याला म्हणतात खरा सुपरस्टार...", असं म्हणत त्याचे चाहते त्याचं भरभरून कौतूक करत आहेत.