साप असं म्हटलं तरी आपल्या अंगावर काटा येतो. त्याला प्रत्यक्ष पाहिल्यावर आपली काय गाळण उडेल याची कल्पनाच न केलेली बरी. पण काही वेळा असे प्रसंग येतात की आपल्याला ज्या गोष्टीची सर्वाधिक भिती असते तेच घडते. अशावेळी आपण सर्पमित्र किंवा वनसंरक्षक यांना संपर्क करायचा प्रयत्न करतो आणि त्या परिस्थितीतून आपली सुटका करुन घेतो. पण आपल्यात धाडस असेल तर त्या परिस्थितीचा सामना करणे आपल्यासाठी सोपे होऊ शकते. काही वेळा सोशल मीडियावर एकाहून एक भन्नाट व्हिडिओ व्हायरल होत असतात. त्यातील साहसी प्रकार पाहून आपल्याला आश्चर्य वाटल्याशिवाय राहत नाही. कधी लहान मुले सापाला सहज हातात घेताना दिसतात तर कधी एखादी लहानगी एखाद्या सापाशी अगदी मित्राप्रमाणे खेळताना दिसते. आता त्यांच्यात इतके धाडस नेमके कुठून येते हे सांगणे कठिण असले तरी त्यांच्या धाडसाचे कौतुक करावे तेवढे थोडेच आहे.
आपण प्राण्यांना त्रास देत नाही तोवर तेही आपल्याला त्रास देत नाहीत असे म्हटले जात असले तरी आपल्या मनात त्यांच्याबद्दल भिती असते हे नक्की. नुकताच असाच एक व्हिडिओ सोशल मीडियावर मोठ्या प्रमाणात व्हायरल होत असून त्यामध्ये एक तरुणी अगदी सहज सापाला हातात पकडताना दिसत आहे. सापाला पकडणं दूर आपण त्याच्या जवळ जाण्याचीही हिंमत करणार नाही. पण एका तरूणीने तशी डेअरिंग केली. एका हाताने सिगारेट ओढत दुसऱ्या हाताने चक्क सापाला पकडण्याचा प्रयत्न करतेय. व्हायरल होत असलेल्या व्हिडीओमध्ये आपण पाहू शकतो की, रस्त्यावर एक विषारी साप दिसत आहे. या सापाला पाहून रस्त्यावरुन जा- ये करणारे प्रवासी घाबरत आहेत. तेवढ्यात अचानक एक तरुण मुलगी तिथे येते. समोर विषारी साप असूनही ही मुलगी एकदम निवांतपणे त्याचा अंदाज घेते आणि सिगारेट ओढतच अगदी पटकन सापाला तोंडाशी धरते आणि उचलते. या सापाला उचलताना तिच्या देहबोलीमध्ये किंवा चेहऱ्यावर जराही भितीचे भाव नसल्याचे दिसते.
या सापालाही रस्त्यावरुन जाणाऱ्या-येणाऱ्या गाड्यांमुळे कोणतीही इजा होऊ नये म्हणून तरुणी सापाला बाजूच्या कुंपणात असलेल्या शेतात सोडून देते. हा व्हिडिओ सोशल मीडियावर मोठ्या प्रमाणात व्हायरल होत असून तो ब्राझीलमधला असल्याचं सांगण्यात येत आहे. मुलीचा हा पराक्रम पाहून तिथे उपस्थित असलेले लोक आश्चर्यचकित झाले आहेत. ‘unilad नावाच्या इन्स्टाग्राम अकाउंटवरून हा व्हिडीओ शेअर करण्यात आला आहे. यासोबत युजरने कॅप्शन लिहिले की, ‘हा साप ब्राझीलच्या जाबोटीकटूबासमध्ये दिसला होता. व्हिडिओमध्ये दिसणाऱ्या मुलीचे नाव जॅकलीन असल्याचं सांगण्यात आले आहे. १५ मार्च रोजी शेअर करण्यात आला होता. आतापर्यंत लाखो लोकांनी हा व्हिडीओ पाहिला असून ८५ हजारांहून अधिक लाईक्सही आले आहेत. इतकेच नाही तर या व्हिडिओवर भरपूर प्रतिक्रिया येत असून नेटीझन्स तरुणीच्या धाडसाचे कौतुक करत आहेत.