लग्न म्हणजे दोन जीवांचेच नाही तर दोन कुटुंबांचे मीलन. हा दिवस म्हणजे सेलिब्रेशन आणि मज्जा. नवीन आयुष्यात प्रवेश करत असताना हा दिवस आयुष्यभरासाठी लक्षात राहावा यासाठी या दिवसाच्या प्रत्येक क्षणाचे फोटो शूट आवर्जून केले जाते. मग त्यासाठी विधींमधून वेगळा वेळ काढून पोजेस देऊन नवरा-नवरी छान फोटोशूट करतात. पूर्वी फोटो काढले जायचे मात्र त्याला आताइतके महत्त्व नव्हते. आता फोटो म्हणजेच एखाद्या इव्हेंटची सर्वात महत्त्वाची गोष्ट असल्यासारखे वेगळे पॅकेज घेतले जाते. इतकेच नाही तर होणाऱ्या नवरा-नवरीला आपल्या कॅमेरात कैद कऱण्यासाठी उपस्थितांचे कॅमेरेही त्यांच्यावर असतात. असाच लग्नसमारंभातील एक अतिशय गमतीदार व्हिडिओ सध्या बराच व्हायरल होत आहे.
यामध्ये नवरा-नवरी फोटोशूट करत असल्याचे दिसते. हल्ली डेस्टीनेशन वेडींगमुळे किंवा लॉन रेस्टॉरंट असलेल्या ठिकाणी लग्न असल्याने लग्नाच्या ठिकाणी पूल असल्याचे बऱ्याचदा दिसते. त्याचप्रमाणे याठिकाणीही स्विमींग पूल असल्याचे दिसते. फोटो काढत असतानाच गमतीने नवरीने नवऱ्याला त्याठिकाणी असणाऱ्या पूलमध्ये ढकलले. विशेष म्हणजे तिने गमतीने केलेली ही गोष्ट तिलाच महागात गेली. कारण तो तर स्विमींग पूलमध्ये पडलाच पण त्याच्यासोबत तिही पूलमध्ये पडली. दोघांनाही काही समजण्याच्या आत हे सगळे घडल्याने तेही पाण्यात पडल्यावर काहीसे कावरेबावरे झाले.
भरजरी कपड्यांत हे दोघेही पूलमध्ये पडल्याचे पाहून उपस्थितांना कदाचित काहीच समजले नसावे. नवरीने लग्नासाठी लाल रंगाचा लेहंगा घातला होता तर नवऱ्या मुलाने मोतीया रंगाचा शेरवानी आणि त्यावर लॉँग कोट घातला होता. पाण्यात पडल्यावर ही नवरी चक्क नवऱ्या मुलाच्या खांद्यावर चढली आणि तिने त्याला किसही केले. हा व्हिडिओ सोशल मीडियावर व्हायरल झाला आहे. द अडॉरेबल वेडींग्ज या इन्स्टाग्राम पेजवर हा व्हिडिओ पोस्ट करण्यात आला असून फॉलिंग इन लव्ह (शब्दश:) असे कॅप्शन त्याला देण्यात आले आहे. अवघ्या ६ दिवसांत या व्हिडिओला ६.५ लाखांहून अधिक लाईक्स मिळाले असून अनेकांनी या व्हिडिओवर कमेंटही केल्या आहेत.