अभिनेते आमिर खान शिराळा तालुक्यातील करमाळेस भेट देणार

शिराळा : शिराळा तालुक्यातील करमाळे या गावास ‘पाणी फाउंडेशन’चे संस्थापक, अभिनेते आमिर खान भेट देणार आहेत. स्वतः आमिर खान यांनी याबाबतची माहिती समाज माध्यमातून एका ध्वनी चित्रफितीद्वारे दिली आहे. यामुळे करमाळेकरांमध्ये उत्साहाचे वातावरण आहे.

मुंबई पोलीस दलात कार्यरत असणारे मूळचे करमाळे येथील राकेश माने यांनी आमिर खान यांच्या घरी जाऊन त्यांना करमाळे येथे येण्याची विनंती केली होती.

करमाळे हे गाव शिराळा तालुक्यातील उत्तर भागात आहे. भरपूर पाऊस पडत असूनही अनेक वर्षांपासून येथे शेतीच्या पाण्याचा प्रश्न गंभीर आहे. बहुसंख्य लोक मुंबईत कामानिमित्त स्थलांतरित झाले आहेत.

वाकुर्डे बुद्रुक योजनेची वाट बघत एक पिढी वृद्धत्वाकडे झुकली. गावातील तरुणांनी गाव पाणीदार होण्यासाठी लोकसहभागातून, श्रमदानाने प्रयत्न सुरू ठेवले आहेत. जलनायक प्रकाश पाटील यांच्या मार्गदर्शनाखाली तीळगंगा नदीच्या पुनरुज्जीवनासाठी प्रयत्न सुरू आहेत. तीळगंगा नदीचा उगम करमाळ्याच्या महादेव डोंगररांगेत होतो. पुढे सुरूल-ओझर्डे-पेठमार्गे ही नदी बहे (ता. वाळवा) येथे कृष्णा नदीला जाऊन मिळते.

महाराष्ट्र शासनाच्या यशदा संस्थेनेही दोन वर्षांपूर्वी याबद्दल पाहणी केली होती. जलसंपदामंत्री जयंतराव पाटील आणि आ. मानसिंगराव नाईक यांनीदेखील करमाळे येथे येऊन वाकुर्डे बु. योजनेचे पाणी देण्याच्या दृष्टीने चर्चा केली; पण गाव उंचावर असल्यामुळे वाकुर्डे बुद्रुक योजनेचे पाणी करमाळ्याच्या तलावात सोडण्यात अडचणीचे ठरत असल्याचे अधिकारी सांगतात.

आता स्वत: आमिर खान यांनी करमाळे गावाला भेट देणार असल्याचे सांगितले आहे. यामुळे पुन्हा एकदा तीळगंगा नदीच्या पुनरुज्जीवन चळवळीला ऊर्जितावस्था आली आहे.

मुंबई पोलीस दलात कार्यरत असणारे करमाळेचे राकेश माने यांनी आमिर खान यांची भेट घेऊन त्यांना करमाळेस भेट देण्याची विनंती केली होती. यानुसार आमिर खान करमाळे येथे येणार आहेत. चित्रीकरणाच्या व्यस्त वेळापत्रकामुळे नेमकी वेळ समजू शकलेली नाही; पण तुमच्या गावाला मी नक्की भेट देणार आहे, असे आमिर खान यांनी एका ध्वनी चित्रफितीद्वारे सांगितले आहे.

गावात पाणी फाउंडेशनच्या माध्यमातून काम सुरू झाल्यास तीळगंगा नदीचे पुनरुज्जीवन होण्याचा मार्ग सुकर झाला आहे. आमिर खान यांच्या येण्याने गावकऱ्यांच्या आशा पल्लवित झाल्या आहेत.

फोटो : १२ शिराळा ३

ओळ : मुंबईत मनोज माने, राकेश माने व राकेश यांच्या पत्नीने अभिनेते आमिर खान यांची त्यांच्या निवासस्थानी भेट घेतली.