पळसखेलजवळ अपघातात चुलती-पुतणी ठार

लातूर जिल्ह्यातील हे मजूर कुटुंब पळसखेल येथील अतुल पवार यांच्या खडीच्या खाणीमध्ये मजुरी करण्यासाठी गेल्या वर्षभरापासून वास्तव्यास आहे. शुक्रवारी दुपारी एक वाजण्याच्यासुमारास मंगल बंडगर, ताराबाई बंडगर आणि पूजा बंडगर या तिघी पिण्याचे पाणी आणण्यासाठी कोळेकर वस्ती येथे चालल्या होत्या. त्यावेळी पळसखेल फाट्यावर मोटार (क्र. एमएच ४२ एएच २३४९) भरधाव वेगाने दिघंचीकडे जात होती, तर समाेरुन भरधाव वेगाने चारचाकी टेम्पो (क्र. एमएच १० बीआर ४१६५) येत होता. या दोन्ही वाहनांची जोरदार धडक झाली. अपघातानंतर चालकाचे नियंत्रण सुटलेला टेम्पो या तीन महिलांच्या अंगावर आला. टेंपोच्या जोरदार धडकेमध्ये तिघीही रस्त्याकडेला जाऊन पडल्या. त्यामध्ये मंगल व ताराबाई यांचा मृत्यू झाला, तर तुळजा बंडगर गंभीर जखमी झाल्या. याप्रकरणी पोलिसांनी दोन्ही वाहनचालकांवर गुन्हा दाखल केला आहे. अधिक तपास पोलीस उपनिरीक्षक अजित पाटील करीत आहेत.